Jaji Mokgoatlheng: 'Umfazi wam uthe mandixolise'

Ijaji echophele ityala lokubulala likaSenzo Meyiwa, uRatha Mokgoatlheng ngoMvulo ucele uxolo emva kwentetho yakhe enkundleni apho enze intetho ejongela phantsi ngokobuhlanga kwiveki ephelileyo.

Ijaji icele uxolo enkundleni, njengoko inkundla iphinde yaqhuba ngentsasa yangoMvulo, apho amadoda amahlanu asenkundleni ngokubulala unozinti uSenzo Meyiwa ngo2014.

"Inye into ekufuneka ndiyihoyile, sonke ndiqinisekile ukuba siyawafunda amaphephandaba. Kufanelekile ukuba ndiwuthethile lo mba. Okokuqala, ndifuna ukuthi, ndineminyaka engama26 ebhentshini, njengejaji ebambeleyo, nanjengejaji. Andizange ndiziphathe ngale ndlela ndenze ngayo [ngoLwesine]. Ndineminyaka engama30 ndiligqwetha ngaphambi kokuba ndibe yijaji," itshilo ijaji ithetha nabantu enkundleni.

"Ndithethe neJP (ijaji eyintloko) kwaye iJP yathetha nam ekunye neDJP. I-JP ngokufanelekileyo indigxekile ngokuziphatha kwam, akufanelekanga ukuba ndithi ndiyijaji enala mava edinawo kunye nesidima ndiziphathe ngendlela endiye ndaziphatha ngayo. Kwaye ndiyavuma, ukuziphatha kwam kwakuthandabuzeka kwaye kwakungalunganga.

"Naye umfazi wam, ebendicinga ukuba uyandoyika, undixelele ukuba mandixolise kuMzantsi Afrika wonke kuba ndingumntu ombi ukodlula la magqwetha ekuthiwa aba iimali zabantu ababamelayo kumatyala eRAF (Road Accident Fund). Ebefunda iphephandaba ngenye imini ngala magqwetha, ebe ngaphezu kwebhiliyoni enye (R1.5 billion) yeemali zeRAF zabantu ababameleyo.

UMokgoatlheng uthe ufuna ukuxolisa ngokungazenzisiyo kuba indlela aziphathe ngayo ichasene nendalo yakhe.

"Ndinonyana ongasekhoyo obeligqwetha. Umdala kunawe uNksz. Mshololo (igqwetha lomnye wabamangalelwa uZandile Mshololo), wazalwa ngo1968. Wasweleka ngenxa yomhlaza wegazi. Ndicinga ukuba naye ebeya kuphoxeka yindlela endiziphethe ngayo. Kungoko ndisithi ngentliziyo yam yonke, ndicela uxolo koogxa bam balapha, kumanene aphambi kwam (abatyholwa)," itshilo ijaji.

"Ndikwatyholwa ngokuba ngumntu onobuhlanga. Ndifuna ukuthetha into enye okanye ezimbini ngam njengomntu ngaphandle kokuba ligqwetha. Ndikhulele kwaMoses Kotane. UNelson Mandela wayedla ngokuza ekhaya, uWalter Sisulu, nditsho noRobert Sobukwe phambi kokuba ahlukane neANC. Utata wam wayelilungu leANC kunye neCommunist Party. Angabaneentloni ukuva ukuba ndingumntu onobuhlanga," utshilo.

Kwiveki ephelileyo, uMokgoatlheng uvakalise umsindo enkundleni emva kokuva ukuba igqwetha lomnye wabamangalelwa uCharles Mnisi ubhalele unobhala wakhe, ecela ukukhululwa kwiinkqubo zangoMvulo ukuze athathe inxaxheba kumdyarho weComrades.

Ijaji, ibonakala inomsindo, iyibeke yacaca into yokuba ubuzaza betyala lokubulala likaMeyiwa abunakubekelwa bucala ngenxa yezinto zobuqu. Ijaji ikwaveze nomba wokuziphatha phakathi kwamagqwetha amele amadoda amahlanu atyholwa ngokubulala uMeyiwa.

"Le yinto eyenzekayo eMzantsi Afrika ephethwe ngabantsundu. Ndiyanixelela ngoku, nokuba ningandibiza u-Uncle Tom, andiqondi ukuba igqwetha elimhlophe linoba nesibindi sokundibuza loo nto. Alinoze," utshilo uMokgoatlheng.

"Andizuphendula. Ukuba uMnu. Mnisi akafuni ukuza enkundleni ngoMvulo, yingxaki yakhe leyo. Ndiza kuba senkundleni kwaye iJP ilindele ukuba ndibe senkundleni," utshilo uMokgoatlheng.

"Andikwazi ukuxelela iJP ukuba kukho umntu oza kubaleka umdyarho. Ngoku ityala kufuneka lime. Wonke umntu kufuneka abukele umdyarho."

Usebenzise njengomzekelo ezinye iijaji eziziimbaleki, eziquka uJaji Boissie Mbha kunye neJaji yeNkundla yoMgaqo-siseko uRammaka Mathopo, echaza ukuba akukho namnye kubo owakhe wavumela ukuzibophelela kwezemidlalo ukuba kuphazamise uxanduva lwabo lwenkundla.

Kwiveki ephelileyo, i-IOL inike ingxelo yokuba iLaw Society of South Africa ivakalise inkxalabo emva kweentetho zikaMokgoatlheng enkundleni.