Iindaba

NPA: 'Utshutshiso ngakwababulala umcuphi waseZwelitsha kufuneka lube qatha'

Abongile Ginya|Published

Baza kugwetywa kwinyanga yeThupha yiNkundla ePhakamileyo eBhisho abathathu abajongene netyala lokubulala ngokungenalusini uW/O Phumlani Dastile eZone 4 eZwelitsha ngo2021.

Image: Umfanekiso ogciniweyo

INkundla ePhakamileyo yamaTyala eBhisho, ibafumene benetyala abathathu, uThando "Flokkie" Mangolwane (25), Siyabonga "Jacks" Zinela (24) kwakunye noSiphelo "Spikiri" Bebe (29), kwityala lokubulala ngokungenalusini uWarrant Officer Phumlani Dastile (44) kweyeThupha ka2021 eZwelitsha.

UDastile (44) wadutyulwa esaphume phandle kwindawo yentselo ekuthwa kukwaMonde’s Tavern eZone 4 eZwelitsha. 

Ngokwengxelo yesithethi seNPA eMpuma Koloni, uLuxolo Tyali, ithi aba badubula uDastile babesuka eKhayelitsha eKapa bezele lo msebenzi wokubulala lo mcuphi nababeqeshwe nguBebe encediswa yitshomi yakhe eyayingaphakathi ejele uKwanga Nojaholo nowaphela sele eba lingqina lombuso. 

Uphando olwaye lwenziwa lwaye lwakhokelela kuBebe nobehleli ecitha isigwebo sakhe sezihlandlo ezithathu zobomi zokubulala, ukuzama ukubulala kwanokuphanga exhobile ngo2018. UBebe isizathu sokuba aqashe abantu ukuba babulale uDastile kungenxa yokuba wayengumcuphi [uDastile] owayephanda ityala lakhe elabangela ukuba achithe izihlandlo zobomi ejele.

OnguMlawuli wezoTshutshiso eMpuma Koloni, uBarry Madolo, uthi ukubulawa kwegosa lezomthetho ayikokuhlaselwa komntu omnye, koko kuthetha ukuhlasela ingalo yomthetho iphela. UMadolo ukwancome uAdv Louis Sinclair obeqhuba olu tshutshiso kwakunye neqela lakhe. 

Ityala eli liza kuqhuba iintsuku ezintathu  umhla we13 ukuya nge15 kweyeThupha 2025 eBhisho apho kuza kube kuxoxwa ngesigwebo esifanele abarhanelwa.