Izihlandlo (8) zobomi kowadlwengula usomashishini owaziwayo!
UMoses Gqesha (45) waseGqeberha ugwetywe namhlanje uLwesine yiNkundla ePhakamileyo yaseGqeberha izihlandlo ezisibhozo zobomi ngezenzo zokudlwengula, ukuphanga, nokubetha.
Image: Facebook
Isidlwengu esiphum’ izandla ekuxhaphazeni amanina kummandla waseGqeberha nebesingaphandle ngengqawule, uMoses Gqesha (45) ugwetywe izihlandlo ezisibhozo zobomi engaphakathi entolongweni emva kokufunyanwa enamatyala okudlwengula, ukubetha ngokonzakalisa, ukuxhwila kwanokuphanga yiNkundla ePhakamileyo yamaTyala yaseGqeberha ngoLwesine.
Elinye lamatyala amakhulu awenzileyo uGqesha kungo2010 ngenyanga yoMnga ngethuba wayedlwengula inkosikazi engusomashishini ekwalitshantliziyo leGBV yaseGoli neyavumayo ukuba igama layo libhengezwe esidlangalaleni yinkundla, uAndiswa "Andy" Kawa, eKing’s Beach, Summerstrand.
Ngokwengxelo yeNPA, uKawa ngethuba ehlaselwa nguGqesha wayezilolonga endleleni nekulapho waqaphela ukuba uGqesha umjonga ngohlobo olungathandekiyo. Emva koko, wambona sele engamboni kanti umlalele nowathi gqi sele ehlasela uKawa embetha wamthathela umsesane wedayimani, izipeks zamehlo ezikhusela ilanga kwakunye nefowuni emgrogrisa ngebhotile yebhiya eyophukileyo.
Isithethi seNPA uLuxolo Tyali, uthi uGqesha wanyanzelisa uAndy nowayeze okwethutyana eMpuma Koloni ukuba baye kwindawo esitheleyo apho wafika wamphinda-phinda emdlwengula ubusuku bonke. Ekuzeni kusa wakwazi ukuphuncuka nowaye wangqala emaPoliseni eyokuchaza. Kwathathwa incindi kwaqokelwa nophando lonke. UGqesha ubanjwe emva kweminyaka elishumi (10) ngo2020 ebanjelwa ukudlwengula elinye ixhoba, apho iDNA yakhe yaye yahambelana naleyo yayithathwe ngo2010 kuAndy.
Kwiingxoxo zenkundla, uGqesha kwafumaniseka ukuba unawo namatyala awayekhe wagwetyelwa ona ngo1993 afana nawokuqhekeza kwanokufunyanwa eneziyobisi. UGqesha uye wawaphika onke la matyala abekwa wona yinkundla wavuma elinye kuphela elokuphanga, nekulapho inkundla iye yamfumana engenanyani kuba exoka phambi kwenkundla.
UMlawuli wezoTshutshiso eMpuma Koloni uBarry Madolo, usamkele ngezandla ezishushu esi sigwebo esithi iNPA iyakuhlala iqinisekisa ngezigwebo eziqatha kwabo bazibandakanya nezenzo zeGBV. UMadolo uthi esi sigwebo sakuba ngumyalezo kwabaninzi kwaye ubonise ukuba nokuba sekunini, ingalo yomthetho iyakuyidlala indima yayo.