Kumbindi wedolophu eDutywa ekuseni ngoLwesithathu ngethuba amaPolisa esenza uphando kwimizimba yabarhanelwa abadubulene namaPolisa ekuzeni kusa ngenxa yokurhaneleka kwebhaki ebehamba ngayo.
Image: Mbhashe Local Municipality
Ngokwengxelo yomhlali othembekileyo kwidolophu yaseDutywa odize ukuba bavuswe zizithonga zompu ekuzeni kusa ngoLwesithathu nebezisithi gqi ngasePosini kumbindi wedolophu, ekufikeni kwabo kuthe kanti ibingamaPolisa ezilwela koonqevu ebebexhobe ngemipu ngethuba bezama ukubamisa ngemoto eluhlobo lwebhaki ebebehamba ngayo babe bengami bona. Umhlali lo, nobephakathi kwenginginya yabahlali ebebebukele, uthi bayawancoma amaPolisa ngomsebenzi abawenzayo mva nje.
Uthi bebekade bengoneliseki yinkqubo yawo kodwa ngoku azijule ijacu. Ngokwengxelo ekhutshwe ngamaPolisa aseMpuma Koloni, ithi, amaPolisa afumene ingxelo malunga nebhaki ekurhaneleka ukuba ibandakanyeka kuphango obelwenzeke ekuzeni kusa kwidolophu yakuQoboqobo.
ULt Col Siphokazi Mawisa uthi abesiPolisa ngokohlukana kwabo babekwe ngokukhawuleza kumbindi wedolophu eDutywa neye ngenene yabonwa le bhaki, xa izama ukumiswa abama abarhanelwa nekulapho kuqale khona udubulwano, nelukhokelele ekubhubheni kwababini (2) abarhanelwa.
AmaPolisa awuthathile umpu kwakunye nebhaki yabarhanelwa. UMawisa uthi, kuphando obeluqhubekeka lusenziwa, amaPolisa afumene ulwazi malunga nomrhanelwa odutyuliweyo emlenzeni ngakwilali iNcandu phezu koMbhashe kwaseDutywa. AmaPolisa aye afumana enye yesibini ibhaki ebehamba ngayo kude kufuphi nomrhanelwa odutyuliweyo ngoLwesithathu. Ziibhaki ezimbini zakwaToyota ezifunyenweyo kwakunye nompu nozakuthathwa uyokuvavanywa ukuncedisa kuphando olwenziwayo.
Umrhanelwa owonzakeleyo uthathiwe wasiwa esibhedlele uyokufumana unyango nojongwe ngamaPolisa. Sithetha nje amaPolisa akhangela abarhanelwa abaqhawulileyo.
UMasipala woMbhashe kwakusasa uye wakhupha imbalelwano esithi abaqhubi bezithuthi mabasebenzise ezinye iindlela zokuphumela ezikumbindi wedolophu nanjengoko uN2 ubucotha ngenxa yophando lwemizimba yabarhanelwa.
AmaPolisa abongoza nabani na onokuba nolwazi malunga naba babalekilyo abarhanelwa. Onolwazi angatsalela isikhululo esikufutshane naye okanye ku08600 10111.