UMbuyie Kasana weIgwiba Lesizwe NPO, nezakube iseLusikisiki ngoLwesihlanu iyokubeka uncumo kubafundi kwakunye nenkampani ebambisene nayo iOperation Smile SA.
Image: FACEBOOK
Lo ngunyaka wesithandathu (6) i-Igwiba Lesizwe NPO isebenzisana neOperation Smile SA beqhuba nephulo layo elithi 'bring a smile' nekuthetha 'zisa uncumo' ingakumbi abo bangathathintweni nangakumbi kwizikolo ezisemaphandleni nakwiilokishi ezihlelelekileyo.
NgoLwesihlanu kule veki, eli phulo liza kube liyokubeka uncumo ebusweni kubafundi besikolo iMkankomo School enabafundi abangapha kwewaka ubuninzi babo nakwisikolo iNgwenyeni S.S S yona enabafundi abayi900 nezikumhlaba waseLusikisiki.
Umsunguli weIgwiba Lesizwe uMbuyie Kasana, uthi nangona iphulo labo ligxile kakhulu kunakekelo lwemilomo, zona intlobo-ntlobo zokuzisa uncumo ebantwaneni zininzi kuba umntwana usenokumphathela izihlangu zesikolo nayo nenye into ayidinga ngamandla esikolweni.
Uthi unakekelo lomlomo lujonge emazinyweni, ikakhulu lujonge kwinto yonke eyenzeka emilonyeni umzekelo abantwana abazalwa beqhekeke imilomo. "UOperation Smile ilunceda kakhulu kuluntu kuba bayakuthatha xa bekubona ufanelekile ukuba uhlinzwe bakuse kwizibhedlele bengajonganga nzuzo," utshilo uKasana.
UKasana uqhube wathi ziliqela izizathu ezibabangela ukuba bakhethe ukutyelelela ezi zikolo, kukuqhuba kakuhle kakhulu kwazo kwiziphumo iminyaka ilandelelana. Uthi okunye kungenxa yeziganeko ezibuhlungu ezithe zehla kwesa sithili ezifana nokusweleka kwabafundi ababini kwanokubulawa kukaTitshalakazi yindoda awayencuma nayo neyenzeka ngosuku lwezithandani.
"Oku ke kusibangele ukuba siphakame siyokubanika uncumo ukucima iingcinga ezinje ngezi. Khumbula kwala ndawo yindawo ekunzima ukufikelela lula kweenkonzo zikaRhulumente nento eye ibangele abafundi bayeke ukuqhubekeka nemfundo ukuphumelela kwabo uGrade 12 ngokokutsho kwengxelo yabazali."
Le nkampani isebenzisana neIgwiba Lesizwe NPO, eyiOperation Smile SA nenjongo yayo egxile ekunakekeleni imilomo, isuka kwilizwe laseUK nangona inazo iiofisi eziseKapa eNtshona Koloni.
ILusikisiki ijamelene nemingeni eminintsi, yileyo kunyaka ophelileyo kuthe kwehla isithwakumbe sokudutyulwa kubulawe abantu abayi18 eNgobozana.