UMprofeti uShepherd Bushiri ekunye noNobhala Jikelele weMK Party uFloyd Shivambu eMalawi.
Image: Facebook/Prophet Bushiri
USekela Mongameli we-Economic Freedom Fighters (EFF), uGodrich Gardee, wongeze ilizwi lakhe kwabo bagxeka uFloyd Shivambu noMprofeti uShepherd Bushiri, ebiza uBushiri isingcoli kunye noMntu kaSathana.
UShivambu ufumene ukugxekwa ngabantu abaninzi baseMzantsi Afrika, kuquka nombutho wakhe, uMkhonto Wesizwe Party, emva kokubonwa noBushiri, owaqhwesha waya eMalawi ngo2020 emva kokuba efumene ibheyile kwityala lokudlwengula, ubuqhophololo kunye nokuxhaphaza imali.
UGardee ungene ezihlangwini zikaShivambu njengoSekela Mongameli we-EFF emva kokuba uShivambu elahle iibharethi ezibomvu wayongena kwiMK Party yowayesakuba nguMongameli weli loMzantsi Afrika uJacob Zuma.
Iflegi yakwaSirayeli ibonwe ecaweni kaBushiri. UMzantsi Afrika waziwa ngokuxhasa esidlangalaleni iPalestina, kwangangokuba wamangalela uSirayeli wawusa ezinkundleni ngenxa yale mfazwe. Ngenxa yoku, abanye baye batyhola uShivambu ngokuxhasa ukuhlanjululwa kohlanga lwabantu basePalestina.
"Uphawu olusemva kwakho luxela indlela ongcole ngayo. Imali yabemi boMzantsi Afrika abamsulwa yayinganelanga kuwe. Ndikhumbula ndidibana nawe eziseleni ukhangeleka ulusizi ... wawubaleka umthetho Mntu kaSathana ozenza uMntu kaThixo," utshilo uGardee kwikhasi lakhe likaX ebhekisa kuBushiri.
Nangona kunjalo, uShivambu ebesoloko elugxeka uhlaselo lukaSirayeli kwiHamas nakubantu basePalestina.
"Ukugxeka iHamas sisenzo sobugwala kwaye ngokuqinisekileyo xa sikhokela uMzantsi Afrika, siza kuzibandakanya ngokuphandle kwaye sikhusele ilungelo layo lokukhusela amaPalestina. #HandsOffHamas," watsho uShivambu ebhala kwikhasi lakhe likaX kweyeDwarha ka2023.
Ngokuphathelele nohambo lwakhe, uShivambu ubhale wathi: "Enkosi mntakwethu, Mprofeti uBushiri, ngokusamkela kunye namazwi anobubele. Ubungakanani bomsebenzi okwinqanaba likarhulumente owenzayo ukuphakamisa abantu bethu kwezoqoqosho, imfundo, intlalontle nangokomoya awunakulinganiswa nanto ngoku nakwimbali.
"Ndiyayazi ukuba iinkokeli nabantu baseMalawi bayazixabisa iinkqubo ezininzi ozenzela abantu. Qhubeka usenza umsebenzi omhle."
Ilungu lePalamente ye-EFF uCarl Niehaus khange afihle indlela aziva ngayo ngalo Sopolitiki.
"Ukuhlawule malini la mkhohlisi womprofeti womgunyathi obaleke umthetho ngale ntetho ilahlekisayo yobudenge? Uthando lwakho lwemali luyaziwa. Yimali eninzi kuphela enokukwenza ukuba ucinge kakubi ngale ndlela," utshilo uNiehaus kuShivambu.