Ezi nkomo zezi zibhaqwe zisaphila nebesele zineentsuku zingasatyi kwaye zingasaseli namanzi nebezivalelwe ngumama wazo ebuhlanti eNgcoya eLusikisiki. Ezisixhenxe zibhaqwe sele zibhubile ngenxa yendlala.
Image: SAPS
Ezi nkomo zezi zibhaqwe ngamaPolisa sele zifile ngenxa yendlala nokuvalelwa imini nobusuku ebuhlanti.
Image: SAPS
Yinkosikazi enama51 ngokweminyaka ubudala yaseNgcoya eHlababomvu eLusikisiki ebanjwe ngamaPolisa kuMgqibelo esisuka kuye ngenxeni yokuvalela iinkomo ezifileyo neziphilayo ebuhlanti kwakhe.
Ezifileyo iinkomo zisixhenxe (7), eziphilayo zintandathu (6) nebisele iziveki zingasatyiyo kwaye zingasafumani manzi ngenxa yokuvalelwa imini nobusuku ebuhlanti.
Ngokwengxelo kaCaptain Welile Matyolo, ithi, esi senzo sibi kangakanga sokuhlukunyezwa kweenkomo kuvele emva kokuba abahlali bethe bahlutshwa livumba elinganyamezelikiyo eliphuma kweli khaya lale nkosikazi.
Ingxelo iqhuba ithi abahlali khange bavunyelwe yile nkosikazi ekubeni bangene ngaphakathi kwakhe kuquka nabo bazalanayo kweli khaya khange bangeniswe ebatyhola ngelithi bathakathe umyeni wakhe ongasekhoyo.
Abahlali babize amaPolisa nafike ezisixhenxe iinkomo sele zifile zabe zityiwa zizinja ngaphakathi ebuhlanti, ezintandathu zisaphila nezithathwe zayokugciniswa ixeshana kwizihlobo kuba kusalindwe ungenelelo lweSPCA.
Le nkosikazi ibanjiwe, igcinwe eziseleni nekulindeleke ukuba ivele kwiiNkundla zamaTyala zaseLusikisiki ingaphelanga le veki. Ijongene netyala lokuhlukumeza izilwanyana.