Igwetywe ubomi indoda yakuCentane eyahlaba yabulala isithandwa sayo ngosuku lwezithandani.
Image: NPA
Wahlatywa ngemela amanxeba alishumi elinesibhozo (18) uSixolise Msatywa (25) ngethuba eyokuthatha isipho sakhe kwisithandwa sakhe esinguZolisa Doli (34) nanjengoko yayilusuku lwezithandani iValentine's ukutsho, engazi ukuba iyakuba sisiphelo sobomi bakhe.
INkundla ePhakamileyo yoMzantsi Afrika nebichotshelwe eGcuwa, imgwebe ubomi ngaphezulu yabayiminyaka emihlanu (5) uDoli emva kokuba imfumene enetyala lokuhlaba abulale uSixolise kwanelokuzama ukonzakalisa udade kaSixolise.
Ingxelo ephuma KwiNPA ithi, ngomhla we14 kwinyanga yoMdumba ngo2023, uDoli wathumela umntwana ukuba abize uSixolise ayokuthatha isipho amphathele sona. Emva kokuba ixhoba liphumile kowalo liyokusabela ubizo, usapho lava ngesikhalo ekukrobeni kwabo bafika uDoli ephinda-phinda ukuhlaba uSixolise ngemela nowaye wakwazi ukunqandwa ngutata owayezidlulela ngendlela.
Isithethi seNPA uLuxolo Tyali, uthi uSixolise, wabalekiselwa kwisibhedlele saseGcuwa nekulapho wafika wathunyelwa kwesaseMonti eFrere nekulapho wathi wabhubhela khona emva kweentsuku ezimbini.
Oku kwenzeka kwilali iMathukwini kuQoboqobo kuCentane. UDoli waye wabanjwa emva kweentsuku ezimbini enze esi sehlo. Ngethuba kuqhuba ityala, uDoli waliphika ityala ethuka amangqina esithi ngamaxoki kudala bengamfuni njengoko babesengafuni kwa obo budlelwane babo noSixolise.
Igqwetha lenkundla uLoyiso Methuso uthi izenzo zeGBV ziyanwena ngokunwena apha eMzantsi Afrika, ngenxa yamadoda anje acinga ukuba bangenza nantoni na abayithandayo kumaqabane abo kwaye bacinge bakusinda.