Iphephandaba lethu ligqiba iminyaka elishumi, isaphokoka imiyalezo yenkxaso nesivuyisayo evela kubantu abathi bayalithanda kwaye bayalifunda eli phephandaba. Nantsi eminye yemiyalezo esiyifumeneyo.
UNkosazana Stella Sigcau: "Sithi huntshu, halala kumzi weSolezwe lesiXhosa egubha iminyaka elishumi lasekwa. Sibulela kakhulu sibamba ngazo zozibini ngegalelo nendima eniyidlalayo ekubhaleni ngemicimbi neziganeko ezenzekayo nenkcubeko ekuhlaleni nibhala ngobuchwepheshe. Eli phepha likhuphula ulwimi lwesiNtu kwaye lincedise ekugcinweni nasekufundiseni ngamasiko nezithethe ngokubhala ngemicimbi yesiNtu nemicimbi eyenziwayo ukuquka eyenziwa ngamaKhosi ekuphuhliseni isiNtu nabantu. Imigubho yamaMpondo (Mpondo Festival), inkciyo yamaMpondo (Mpondo Reed Dance) neminye yemisebenzi esiyenzayo ekuphuhliseni ubuntu nesiNtu sethu iyaziwa ngenxa yemisebenzi yenu nileli qumrhu neentatheli zenu ezizinikeleyo kwimisebenzi emihle. Qhubekani nalo msebenzi umhle kangaka. Siyazingca ngani. Phambili. Halala. Siyanihalalisela, sibhiyoza nani."
UNkosi Zweloxolo Stokwe: "AmaQwathi athi makwande apho nithatha khona niqhubeke nokuphucula intlalo nemeko uluntu oluphila kuzo ngokuthi nizibeke zinjalo kwiphephandaba lenu, kaloku sinazi ngokuzibeka zinjalo iindaba ningakhethanga zityebi kwizilambi. Ngethemba niyakulonwabela ukugqiba le minyaka ilishumi nikhona."
UVuyokazi Matanzima: "Siyabulela ngoncithu lwenfaba esiziphakelwa zishushu liphephandaba I'solezwe lesiXhosa. Qhubekeka usiphakela ngezinto ezisingqongileyo nokusikhuthaza ngemveli yethu. Halala ngokugquba iminyaka engaka, qhubekeka nemisebenzi emihle kuluntu lomzi ontsundu. Halala."
ULusanda Sizani: "Kule minyaka ilishumi I'solezwe lesiXhosa lizibonakalisile njengomlomo woluntu oluntetho isisiXhosa, ngokuthi gqolo lisondla uluntu, ingakumbi, olwesithili iChris Hani, ngeendaba eziphuhlisayo nezingangxengwanga. Sininqwenelela impumelelo, inkqubela phambili neminye iminyaka eyongezelekileyo yokwabelana ngolwazi noluntu. Huntshuu!!!!"