IKrismesi ifike phambi kwexesha kumanina angoosomashishini eCala!
Zikhona Bhabha
Njengenxalenye yemibhiyozo yokuvalwa kwenyanga yamanina, oosomashishini abasakhulayo kwiiWadi ezahlukeneyo kumasipala wasekuhlaleni iSakhisizwe bancediswe ngezixhobo zokusebenza yiofisi yenqila yaseXalanga eCala ngoMvulo umhla wamashumi amabini anesibhozo kweyeThupha.
La manina aphuma kwiiWadi ezahlukeneyo zalo masipala banamashishini ohlukeneyo aquka ukuthunga, ukufuya iinkukhu nokupheka; banikwe ezi zixhobo kwiholo yedolophu ngoMvulo. Le ofisi inikezele ngezizixhobo kwabasomashishini ngeenjongo yokubakhuthaza ukuba baqhubeke bakhulise amashishini wabo.
Usihlalo wekomiti yalenqila, olilungu lepalamente uMama uWeziwe Tikana-Gxotiwe uthi le ofisi imihla ngemihla ijongana nezicelo zoluntu lwalo masipala kodwa kweli tyeli bakhethe aba somashishini ngokweewadi ncakasana amanina ngeenjongo zokuvala imibhiyozo nemisitho yenyanga yeThupha nebekelwe bucala ukubhiyozela amanina kweli loMzantsi Afrika.
“Sigqibe kwelokuba siwonge amakhosikazi xa kuvalwa le nyanga yamanina. Siyayazi indima ebalulekileyo edlalwe ngamanina kwinkululeko yeli lizwe.
“Sikhethe aba somashishini ngokoluhlu lwabantu ababefake izicelo zenkxaso kule ofisi kodwa ngelishwa kwabe kungekho mali kwingxowa yethu ngelo xesha. Ngumnqweno wethu ukubona amashishini wabo ekhula kuthi kanti esi sisiqalo,” utshilo uTikana-Gxotiwe.
Lo kaTikana-Gxotiwe uthi le ofisi iqinisekisa ukuba lonke uluntu luyancedakala kwaye ayinanto yakwenza nambutho wapolitiko umntu azimanye nawo. Ukwathe ukunikezelwa kwezi zixhobo kukuqinisekisa iphulo lika Vuk’ukuzenzele nokuba uluntu luthabatha igxathu ekukhuliseni uqoqosho kulo masipala.
Umama uLindiwe Ndlela othe waxhamla kule nkqubo ophuma kwaWadi 6 uthi, kuluvuyo nenkuthazo oku kubo. Uthi oku kuzakuncedisana kakhulu neshishini lakhe kuba izinxibo ezimbejembeje zenyanga yoMnga uzakukwazi ukuziqoshelisa ngamalaphu awafumeneyo.
Zizixhobo ezifana noomatshini bokubhaka, ukutya kweenkukhu, kunye nezixhobo zokuthunga ezinikezelwe yile ofisi kula manina.