Capa: ‘Sizakulwela amanina axhatshazwayo’
Amanina ombutho olawulayo iANC engungelene eICC eMonti ngempela veki ngethuba kusonyulwa ozakukhokela amanina kweli Phondo.UMFANEKISO: ANC
USomlomo womasipala wengingqi iOR Tambo uNtandokazi wonyulwe njengosihlalo omtsha wamanina weANC eMpuma Koloni.
UCapa okwangusekela sihlalo weANC eOR Tambo wonyulwe ngaphandle kokuphikiswa kwinkomfa ebiseMonti ngempelaveki nebizinyaswe ngamanina abalelwa ku500.
Le nkomfa ilandela inkomfa yamanina eANC kazwelonke ebibanjelwe eGoli kwiveki ezimbini ezingaphambili, neyonyule inzwalelelwane yeli phondo uSisisi Tolashe.
UTolashe obezimase inkomfa yamanina eMpuma Koloni uthe ukonyulwa kweenkokeli zalo mbutho kweli phondo kuzakuwuvuselela umbutho wamanina nongathi sisigulane esilele ngandletyana nye.
“Ngokonyula iinkokeli niyazivuselela nikwazilungiselela amadabi ajongene nombutho weANC,” utshilo uTolashe.
Esamkela ukonyulwa, uCapa uthe uyakuvuyela ukuthunywa ukuba enze umsebenzi wokukhokela nokuphuhlisa amanina kweli phondo.
“Sizakugxila ekulweni nokuphathwa gadalala, kwakunye nokubulawa kwabasetyhini, ukuhlukunyezwa ngokwesini, kwanokunikwa amalungelo ngokufanayo phantsi koorhulumente nakwiinkampani zabucala,” uthethe watsho uCapa.
Ukwathe bazakusebenza beliqela elibumbeneyo nabo athe wonyulwa nabo.
Kwakule nkomfa uClara Yekiso-Morolong onguceba weANC eBuffalo City wonyulwe njengosekela sihlalo, umphathiswa wokuhlaliswa koluntu eMpuma Koloni uSiphokazi Mani-Lusithi wonyulwa njengonobhala, osekelwe nguNomakhosazana Nongqayi okwangusodolophu kumasipala Amahlathi, waze umphathiswa wezolimo kweli phondo uNonkqubela Pieters wonyulwa njengonongxowa.