Idemeshe yeR10.6 million emva kokutshiswa kweebhasi eGqeberha

AMAPOLISA aseGqeberha aphanda ityala lokonakalisa emva kokuba kutshiswe iibhasi ezisibhozo kwisiza esiseMotherwell eGqeberha ngobusuku bangoLwesithathu.

Isithethi samapolisa, uColonel Priscilla Naidu, uthi ezi bhasi ziqatshelwe ngunogada obone kutshiswa bhasi ithile ngethuba esenza umsebenzi wakhe wokujikeleza.

Emva kokuqaphela le bhasi itshayo, kutsho uNaidu, lo nogada ubaleke eyokucela uncedo. “Ngethuba ebuya (lo nogada), uqaphele ukuba ezinye iibhasi ziyatsha. Akukho mntu wonzakeleyo,” utshilo uNaidu ekwathi bekungekho bani obanjiweyo ngethuba sibhala eli nqaku ngoLwesine.

Ummandla waseGqeberha ugutyungelwe luqhankqalazo oluqhutywa ngabaqhubi beeteksi abakhaleza iimali zabo zeCovid-19 kubanini beeteksi.

UMkomishinala Lieutenant General, uLiziwe Ntshinga, usikhalimele esi sehlo, esithi ukonakaliswa kweempahla zabantu, kuvalwa kweendlela kwanokuthintela ukusiwa kweenkonzo ezingundoqo lulwaphulomthetho olungazukwamkelwa.

USodolophu waseNelson Mandela Bay, uNqaba Bhanga, bekulindeleke ukuba aqhube nokubamba indibano ngoLwesine kwakunye nababandanyekayo kolu qhankqalazo. UBhanga uthi ukonakaliswa kwezinto ngethuba loqhankqalazo akwamkelekanga.