Odlala kumdlalo odumileyo Inimba utyelele izikolo eCumakala
UNomasebe Andrea Dondolo ephakathi kwakunye nabantwana bezikolo ezohlukeneyo ababeveza ububona ngomxhentso, umdaniso, ukubonga nokucula eCumakala.
Image: UTHUNYELWE
Abafundi kwanabathandi bezobugcisa nenkcubeko bazalise iholo iMzwandile Wilson Fanti Recreation Centre beyokutyebisa iindlebe neengqondo ngolwazi ngezobugcisa.
Owaziwayo kwicandelo lezobugcisa nokumdlalo ongundabamlonyeni Inimba ekuMzansi Magic, uAndrea Nomasebe Dondolo, nguye obesisithethi esiphambili kulo msitho.
UDondolo ubuyele ekhaya ngokuya kwakhe eAmahlathi nanjengoko ngaphambili wayekhe wangu titshalakazi womculo, idrama kwakunye nemibongo kwizikolo zaseCumakala.
Izikolo ebeziyinxalenye yolu tyelelo yiCenyu Public School, Fundani High School, Cathcart High School kwakunye neKubusie Combined School. Aba bafundi babonakalise italente yabo ekuculeni, ekubongeni kuquka ukulingisa nokudanisa.
UAndrea Nomasebe Dondolo ongumdlali kwi-Inimba ekuMzansi Magic, eseCumakala.
Image: UTHUNYELWE
Umxholo wosuku ubusithi “Ancestral Memories-Iinkumbulo Zookhokho," nelinyathelo enjongo yalo ikukuvuselela kwanokukhulisa italente kubantu abatsha, nakuluntu loMasipala waseAmahlathi.
Ngeli nyathelo, uDondolo ufuna ukuphinda adibanise abantu abatsha kunye neengcambu zabo zenkcubeko ngelixa ebakhuthaza ekubeni baziveze ububona ngezobugcisa.
USodolophu waseAmahlathi, uNomakhosazana Nongqayi, ebhekisa kubafundi ugxininise ukubaluleka kwembeko nentlonipho kwanokuzinikela kwimfundo.
UNonqgayi ukwakhumbuze abafundi ngelithi imfundo ngundoqo kwimpumelelo ebomini, watsho ebabongoza ukuba bawaxabise amathuba abanikwa wona ukuze babe nekamva eliqaqambileyo.