Kuthiwa akusekho konwaba kwiJoyous Celebration yodumo!

Akusekho konwaba kwiqela lomculo wokholo elaziwayo ekuthiwa yiJoyous Celebration. Ingxelo ekhutshwe liphephandaba langempelaveki, iSunday Times, ithi abaphathi baxabene ngenxa yokungaphathwa kakuhle kwemali.

Kuthiwa nguLindelani Mkhize ojongene nezityholo eziliqela zokungaphathi kakuhle imali yeJoyous Celebration. Eli qela lomculo wokholo lasungulwa ngonyaka ekwafika ngawo inkululeko (1994) nguLindelani Mkhize, uMthunzi Namba noJabu Hlongwane benenjongo yokuvelisa nokulola italente eMzantsi Afrika.

Ngokutsho kweSunday Times, uMkhize utyholwa ngokuyixeli imali ekweletwa iJoyous Celebration ekuthiwa ingqingwe nguSars ofuna imali yerhafu eqabele ngaphezulu kwesigidi serandi (R1-million). Kuthiwa ukufika kwabaxhasi abaquka uMTN, iAfrican Bank neBantu Sneakers zange kuxelwe kakuhle.

Ngaphezulu koko, kukho iimali uMkhize awayalela ukuba zifakwe ebhankini yakhe emva kwekhonsathi yonyaka ka2022, 2023 neka2025. Kuthiwa yimali engaphezulu kwesigidi serandi ayichithe kwiindleko zotyelelo eminyakeni emithathu edlulileyo.

Kanti ngonyaka ka2017, kuthiwa uMkhize waboleka imali eyiR300.000 kwiJoyous Celebration angazange ayibhatale. UMongezi Ramalivha, olugqwetha likaMkhize, uxelele iSunday Times ukuba abafuni ukuthetha ngeenkcukacha zembambano ngoba yinto efanele abantu abachaphazelekayo.

Eminyakeni engaphezulu kwamashumi amathathu edlulileyo, iJoyous Celebration incede inqwaba yeemvumi ezicule kuyo, zakhula emva koko zazivulela iindawo zazo. Futhi zininzi neembasa eziphumeleleyo eminyakeni edlulileyo.

Nangona kusekho ingxaki, yona iJoyous Celebration isaphethwe nguMkhize, uNamba noHlongwane ngokubambisana. Akukacaci ukuba iinzame zokusombulula imbambano zakuhamba umgama ongakanani na.

URamalivha uthe unethemba lokuba ingxaki iza kusonjululwa ngesihle ngabaphathi beqela lomculo wokholo. Naye uNamba uxelele iSunday Times ukuba ukhule naye uMkhize kwiphondo aKwaZulu-Natal futhi akukho ngxaki phakathi kwabo.