UPan ufuna ukubayinkuthazo kulutsha lakokwabo
UZWELI sisicimamlilo esinkaba iseMafikeng, kodwa ngoku uthabatha uhambo olusingise eHillside, eqhutywa yintshasakalo yokufumanisa inyaniso ngoyise omzalayo.
UZweli uchazwa njengendoda ezithembileyo nenomoya omhle kwabo bamngqongileyo. Ibali likaZweli liza kutyhila iimfihlo nengxubakaxaka.
UChumani Pan, inzalelwane yaseMooiplaas cebukuhle eMonti eMpuma Koloni, nguye odlala lo mlinganiswa mtsha kwi-7de Laan.
UPan ukhe wanguMonwabisi kwisizini yokuqala neyesibini kumdlalo we-e.tv, iAshes to Ashes.
Eminye imidlalo aziwa kuyo kuyo kumabonakude iquka umdlalo wekykNET iProjek Dina, umdlalo ongezonyango othi Wounds kwi1Magic, iMontana neGenerations kwiSABC1 kwakunye neThe River.
Encokolela I'solezwe lesiXhosa ngale ndima yakhe intsha, uPan uthi unethamsanqa ukufumana indima kumdlalo weAfrikaans nanjengoko olu ilolunye leelwimi azaziyo.
“Ndabanethamsanqa ukwazi ulwimi lweAfrikaans nanjengoko ndikhulele eMitchell's Plain.
“Nangona ndingekho 100% kwiAfrikaans kodwa ndiyakwazi ukuyithetha. Kodwa le ndima ye-7de Laan ayoyeAfrikaans, bebekhangela nje uZweli. Ukuthetha iAfrikaans ibe yibhonasi,” kutsho uPan, esithi lo ngumdlalo wakhe wesine weAfrikaans.
Uthi ucinga ukuba abo benza imidlalo entetho iyiAfrikaans bayamthanda.
“Iyachulumancisa eyokubakumdlalo omkhulu nothandwayo luluntu. Ndinethemba lokuba oko kuza kubayinkuthazo nakwabaseMpuma Koloni xa bebona umntwana wabo kulo mdlalo, kwaye oku kuza kubaqhubela ekufezekiseni amaphupha abo,” utshilo.