Ulonwabo luseHogsback!
YIBA nombono wempelaveki yonke uzikhuphele kubuhle bedolophu yaseHogsback, ungcamla umdiliya kwaye umamele umculo kaKelly Khumalo, uLloyiso, Natz EFX noZuko SA.Kwelinye icala ubuka ezo ntaba zombethwe likhephu.
Ngokuzibekela indawo kwangethuba kulo mnyhadala, oku kungakwenza uzibhaqe sele ungomnye kwabaninzi abaza kube belapho kwiMusic In The Snow 2023 Excursion.
Singayilibala njani iPotjiekos Sunday?
UMlindi Ntloko onguMququzeleli walo mnyhadala uxelele I'solezwe ukuba amatikiti ayavulwa eWebticket ngoLwesihlanu we19 kuCanzibe 2023, kwaye amatikiti omnyhadala ngamnye aza kuthengiswa ngokohlukana kwawo.
“Ungalibazisi, zikhangelele indawo yokuhlala kwangoku phambi kokuba iphele ngokukhawuleza,” kucebisa uNtloko.
Lo mnyhadala weWinter Musical Explosion uxhaswa yiEastern Cape Jazz Festival, Ebubeleni Festival, uSandla Black neSAMPRA.
Ingena kunyaka wesibini iMusic In The Snow Excursion. Kunyaka ophelileyo, iHogsback yamkele imiqodi yabantu abebezokonwabela ubuhle bale ndawo ebusika nomculo kaMsaki, Bongeziwe, Natz EFX noIkhona.
Lo mcimbi ungomhla we29 kweyeKhala eHogsback Inn. Amatikiti aqala kuR350 kuphela eWebticket. Ungalibazisi!