Ukugqwesa kukaThrowhit waseNgqushwa emculweni
ISELUNCUMO eNgqushwa nakubathandi bomculo kaBakhulule Mhluzi osandul' ukuphumelela imbasa kumsitho weHustlers Awards obubanjwe kutshanje.
Le mvumi yeHip-Hop yaziwa ngegama likaThrowhit. Eli gama lichaza kakuhle ukuba waziwa ngokukhupha ucwambu lomculo onomyalezo kwaye nokubuyela ekhaya ephethe le mbasa bubungqina balo nto.
Encokolela I'solezwe, uThrowhit, 33, uthi uqale ukukhwezela imbiza yomculo wakhe kwisithuba seminyaka elishumi edlulileyo.
“Xa kunamhlanje ndaziwa njengoMrepa omkhulu wasePeddie,” uqhayise watsho.
UThrowhit uthi uqale ukucula ngexesha bekudume umculo wooMashava noSuper.
“Xa ndicinga inokuba kwakuphaya ngo2004/5. Ndandizirekhoda kwikhasethi nomkhuluwa wam sisebenzisa izandi zikaMashava,” kukhumbula le mvumi.
Ekunye neetshomi zakhe uAndile noSicelo, ngo2008 benza iqela lehip-hop balibiza Innovation.
UThrowhit nabahlobo bakhe bashicilela iingoma ezifana noUbomi bunzima noIt's all about the vibe, besebenzisa usingastudiyo okwigumbi lokulala.
“Ngo2010 sohlukana ngenxa yemfundo, ngo2012 ndaziculela ndedwa, kulapho yaqala khona indaba,” kuncokola uThrowhit.
UThrowhit ukhuphe ingoma ethi Bounce It esebenza nongasekhoyo uDJ Mzo weRed Dragon Records njengeprodyusa.
Uthi le ngoma yaba yintandane yabantu baseNgqushwa kwaye yadlala nakwiTruFM.
“Ngala nyaka ndiyikhupha ngayo kwakufika iTruFM eNgqushwa izokwenza iRadio Presenter Search, ndaze ndafumana ithuba lokucula khona, emva koko ndafumana nodliwanondlebe emoyeni.”
UThrowhit ukhule ethanda umculo kaMandoza, watshintsha wathanda okaProKid. Uthi yile mvumi, nayo engasekhoyo eyamenza wathanda ihip-hop.
Ezinye zeengoma ezenze uThrowhit waduma ngezo zifana noYaqal' indaba, Ndim Lo, Umthandazo kaLova, Ndenza Kakhulu noZizojik' izinto.
Imbasa yakhe asandul' ukuyifumana kwicandelo loMculo noLonwabo uthi uyisebenzele nzima. Uthi idyudyu ibikhona ngethuba lovoto kuba ebekhuphisana noosaziwayo kwezolonwabo.
“Lo nto khange indityhafise, ndaqhuba ndikhankasa, ndivotisa abantu ekasi, emsebenzini nasekhayeni,” uthethe watsho.
“Ndavota ngayo yonke imali endinayo kuquka imali yee-akhawunti neepolisi zam. Into eyandincedayo kukuzinikela nokukhupha konke endinako,” kutsho le mvumi.
UThrowhit uthi uza kukhupha elinye icwecwe ekupheleni konyaka. Umculo wakhe uwushicilela kuSobz Melanie weHoodriders Entertainment eQonce. Ubambe ngazibini nakwinkampani aphantsi kwayo iSoulful Entertainment asebenze nayo ukususela ku2018.