Ingaba uSaleng uza kuba liKhosi?
Kukho amarhe athi uMonnapule Saleng angadlalela iKaizer Chiefs, kodwa anyanisile kangakanani la marhe?
Image: Sydney Mahlangu/BackpagePix
Sele kusondele inyanga kuthe kwavela amarhe okuba umdlali weOrlando Pirates uMonnapule Saleng angaya kudlalela iKaizer Chiefs, kwaye akukhange kubekho olunye uhlaziyo olungaphaya malunga noku.
USaleng usenesivumelwano sengqesho nePirates de kube ngunyaka ka2027 kodwa akazange abonakale kwiqela ukusukela kweyoMnga ka2024.
Lo mdlali, 27, ngokweengxelo, kukholelwa ukuba ebengadlali ngenxa yokungaboni ngasonye malunga nomvuzo wakhe.
Nangona kunjalo, njengoko kungakhange kuthethwe nto yiPirates, amarhe asaqhubeka ejikeleza.
Amarhe okuya kukaSaleng kwiKaizer Chiefs
Kwinyanga ephelileyo, bekuvakala amarhe athi uSaleng angawela indlela aye kwelinye iqela elikhulu laseSoweto.
Njengomnye wabadlali ababalaseleyo kweli loMzantsi Afrika nongenalo naluphi na uhlobo lokonzakala, ukungabikho kwakhe kuviwe kakhulu ngabalandeli bePirates kule sizini idlulileyo.
USaleng ugqibele ukudlalela iPirates ngomhla wesixhenxe kweyoMnga xa yayisingathe iAl Ahly kumdlalo weCAF Champions League eOrlando Stadium, nophele la maqela ebambene ngeqanda.
USaleng, nangona kunjalo, wakhethelwa ukudlalela aBafana Bafana kumdlalo wokutshayelela iAfrican Nations Championship (Chan) eBloemfontein ekuqaleni kweyoKwindla nothe wadlala kakuhle kakhulu.
Owayesakuba ngumdlali wasesiswini wePirates, uBenedict Vilakazi, nochithe ixesha lakhe elininzi njengomdlali (1999 – 2007) kweli qela likhulu laseSoweto, uveze uluvo lwakhe ngomba kaSaleng, esithi akazuyifanela iChiefs.
"Ngaba uSaleng luhlobo lomdlali onokudlalela iChiefs ngenene, ngale ndlela idlala ngayo? Andicingi njalo. Umzekelo, jonga [uGaston] Sirino, akasenguye laa Sirino sasimazi kwiSundowns, ngenxa yohlobo lwabadlali abamngqongileyo," uphawule watsho uVilakazi kwiYouTube Channel ye-omniaudioafrica.