Iqela likaShauwn Mkhize liyathengiswa ukuze akwazi ukuhlawula imali ayityala kwaSars.
Image: Ayanda Ndamane/Independent Newspapers
Ilungu leMK Party ePalamente uDavid "Mazolman" Skosana uqinisekise ukuba usifakile isicelo sokuthenga iqela laKwaZulu-Natal iRoyal AM, kodwa imali yakhe yezigidi ezilishumi elinesihlanu zeerandi (R15 million) ibinganelanga ukuthenga eli qela.
Umhla wokugqibela wokuthenga eli qela likaShauwn Mkhize ubungentsimbi yesine emva kwemini ngoMvulo.
"Sixelelwe ukuba siza kwaziswa ngentsimbi yesine emva kwemini, kodwa ukuza kuthi ga ngoku asikhange siyifumane imbalelwano kwaSars, oko kuthetha ukuba asiphumelelanga kwaye siyayamkela loo nto," utshilo uSkosana, ngokutsho kweSowetan.
"Oku ibimalunga nokuba ngubani ofake imali eninzi kwaye kuyacaca ukuba eyethu ibingeninzi kangako," wongeze watsho uSkosana.
"Besiceba ukufudusela iqela kwaNdebele, kodwa sinethemba lokuba liza kubakhona elinye ithuba."
USkosana wongeze ngelithi nangona bebeza kufumana umthwalo owongezelelekileyo wezemali, baqinisekile ukuba ngebekwazile ukukhupha eli qela engxakini. "Besiyazi kakuhle le meko kodwa sabona ngathi singalihlangula iqela. Siza kuqhubekeka sijonge," utshilo.
Eli qela linikwe isithintelo sokuthenga nokuthengisa abadlali ngumbutho olawula ibhola ekhatywayo kwihlabathi jikelele iFIFA ngenxa yezigidi ezilishumi elinesihlanu zeerandi (R15 million) elityala owayesakuba ngumgadli walo uSamir Nurkovic. Eso sithintelo sibangele ukuba iqela lidlalise ebaleni uAndile Mpisane, usihlalo weqela nonyana kaMkhize kwimidlalo yeligi.
Njengoko izinto zimi kwiBetway Premiership, eli qela libonakala ngathi lingafumana izembe. IThwihli Thwahla isezantsi ngamanqaku asibhozo kuphela. Ngelixa uninzi lwamaqela lunemidlalo ephakathi kweshumi elinesibini kunye nesithoba eseleyo ukuba iyidlale, iRoyal AM idlale imidlalo elishumi elinanye kwaye ibigqibele ukudlala kweyoMnga.
Related Topics: