Imililo yamadlelo ingakhokelela ekunyukeni kwamaxabiso enyama nokutya eMzantsi Afrika

Amafama kuMzantsi Afrika uphela alumkiswe ukuba aqinise iinzame zokuthintela imililo, nanjengoko le mililo yamadlelo isenokutshabalalisa izityalo nemfuyo, nto leyo enokhokelela ekubeni anyuke amaxabiso okutya.

Ngokweengcali, ukusukela ngo2015, amafama kulo lonke elaKwaZulu-Natal, eMpumalanga, eLimpopo, eFreyistata, eNtshona Koloni, eKaroo, naseGauteng athe gqolo ukuchaphazelwa yimililo yamadlelo eqatha ngexesha lemozulu eyomileyo nenomoya, nto leyo ebangele umonakalo omkhulu kwizityalo, imfuyo, kunye neziseko ezingundoqo ezibalulekileyo zeefama.

Amafama aye abongozwa ukuba abeke amanyathelo okulawula umngcipheko wemililo yamadlelo unyaka wonke kwaye usebenzisane norhulumente namanye amafama ukulandela iinkqubo okanye izivumelwano eziya kuthi zithintele iintlekele xa ziqala imlilo kwiindawo zabo.

UDawie Maree oyiNtloko yoLwazi neNtengiso kwaFNB Agriculture ulumkise ngelithi amaxabiso okutya sele enyukile kweli lizwe.

"Xa kuqwalaselwe ukunyuka kwamaxabiso okutya eMzantsi Afrika kunye nemingeni eqhubekayo amafama ajongene nayo, oku kongeza kwimiba yokhuseleko lokutya ngokuba nefuthe kubonelelo kunye nexabiso lokutya," utshilo uMaree.

UMaree wongeze ngelithi ilahleko inkulu, indawo enkulu yezityalo kunye namadlelo atshatyalalisiwe, ukufa kwemfuyo, kunye nomonakalo weziseko zefama ezixabisa imali eninzi, nto leyo eyenza kubenzima kumafama amaninzi ukuba abuyele ngokukhawuleza.

"Okwangoku inyama ngokukodwa yeyona nto ibangela ukunyuka kwamaxabiso okutya emva kokunyuka into engangeenyanga ezingama25, inyama isemngciphekweni omkhulu njengoko ukufa kwezilwanyana, izibonelelo zokutya, amadlelo kunye nokulahlekelwa ziindawo zokugcina iimveliso zinokubeka abavelisi benyama phantsi koxinzelelo olungaphezu kwento abajongene nayo ngoku ngenxa yokuqhambuka kwesifo somlomo (FMD)," wongeze watsho.

NgokweNkcazo-manani yoMzantsi Afrika, nangona ukunyuka kwamaxabiso kuthe kwaphola kancinci kulo nyaka uphelileyo, imingcipheko yokunyuka kwamaxabiso isekhona, ingakumbi kumaxabiso okutya. Amaxabiso enyama, ngakumbi inyama yenkomo, aqhubeka enyuka kakhulu.

Ngenyanga yeSilimela, umyinge wexabiso yenyama yenkomo yohlobo lweStewing Beef unyuke waya kutsho kwiR118.02 ngekhilogram enye ukusuka kwiR96.35 ngonyaka ongaphambili, ngelixa amaxabiso eRump Steak enyuke ukuya kwiR194.09 ukusuka kwiR160.50 ngekhilogram enye kwangelo xesha linye.

UMaree uphinde wabongoza "amafama ukuba abeke amanyathelo afanelekileyo okunciphisa umngcipheko wokutsha kwamadlelo."

"Phakathi ngoku kunye nokuqala kwexesha lemvula malunga nenyanga yeDwarha neyeNkanga, imililo yamadlelo inokunwenwa ngokukhawuleza, itshabalalise iifama, kwaye ishiye umonakalo," wongeze watsho.