Emva kweenzame ezithathe iintsuku zokukhangela nokuhlangula, isithuthi sohlobo lweVW Polo ebesilahlekile sifunyenwe kumlambo iHennops River, apho kufunyenwe imizimba yamapolisa amathathu ekuqaleni kwale veki – neminye emibini.

Isithethi samaPolisa kuzwelonke uAthlenda Mathe uqinisekise ukufunyanwa kwale moto ngoLwesine.

"Ndingaqinisekisa ukuba iqela lokukhangela lifumene imoto kumlambo iHennops ngale njikalanga. Izinto, kuquka ibhegi, zifunyenwe ngaphakathi emotweni.

"Ukusukela ngoko, imizimba emihlanu kunye nezixhobo zemoto zifunyenwe ecaleni komlambo njengoko amapolisa eqhubeka nophando lwawo malunga nokuba kwenzeke ntoni."

UMkomishinala wamaPolisa kuzwelonke, uFannie Masemola, uvakalise amazwi ovelwano kwaye nethemba lokuba iintsapho ziza kufumana uxolo.

"Ukufunyanwa kwesithuthi kunye nemizimba iya kuzisa uhlobo oluthile loxolo kwiintsapho zamapolisa abhubhileyo nakoogxa bethu. Ibiyinkqubo ende nenzima, kodwa sinethemba lokuba oku kuya kusinceda siqonde ukuba kwenzeke ntoni na ngolo suku."

Inkxaso nempendulo yoluntu

UMathe uthe iiyunithi ezininzi ezikhethekileyo, eziquka amaqela eeDrone akwaSAPS, iingcaphephe ezijongene nolwaphulomthetho ngokusebenzisa iikhompyutha, iiHawks, iGauteng Traffic Airwing, kunye neBidvest Protea Coin Airwing, ziyaluxhasa uphando.

Kusenjalo, eBloemfontein, kuye kwaququzelelwa umthandazo wokunika intuthuzelo kwiintsapho ezibhujelweyo kunye nabasebenzi basebupoliseni.

UMasemola ugxininise ukuba uphando lusaqhuba, kwaye basebenza ngenkuthalo ukufumana iinkcukacha ezipheleleyo ngonobangela wokubhubha kwala mapolisa.

Akukabikho sizathu sisemthethweni sokubhubha esisele sichaziwe, kwaye amapolisa abongoza uluntu ukuba luhlale lunomonde njengoko besadibanisa iziganeko ezikhokelela kule ntlekele.

Okwenzekileyo

La mapolisa agqityelwe ukubonwa kwisikhululo samafutha kufutshane neGrasmere Toll Plaza ngentsasa yangoLwesine, umhla wama24 kuTshazimpuzi 2025.

Bebehamba ngemoto yohlobo lweVolkswagen Polo ngethuba belahleka.

Emva kokuduka kwabo, abasemagunyeni baye baqalisa iphulo lokukhangela elibandakanya iindadi zamapolisa, iiyunithi zedrone kunye namaqela ohlangulo.

Kangangeveki, abaphandi bagqogqa uhola wendlela uN1, imijelo yamanzi engqongileyo, kunye nomlambo iHennops ukuze bakhangele isithuthi nabo babehamba ngaso.

Imizimba yala mapolisa, uKeamogetswe Buys (30), uBoipelo Senoge (20), noCebekhulu Linda (24) ifunyenwe kulo mlambo emva kokubikwa njengabalahlekileyo nabaduke iintsuku ezintlanu.

Ngomhla wama30 kuTshazimpuzi 2025, amapolisa aqinisekisa ukuba izixhobo zeVW Polo ebilahlekile zifumaneke kumlambo iHennops.

Thabo Makwakwa

iVW Polo yamapolisa ebilahlekile ifunyenwe eHennops River