Umbutho iBuild One South Africa (BOSA) uvakalise umsindo ngokusetyenziswa gwenxa kwemali engaphaya kwezigidi ezihlanu zeerandi (R5.2 million) ebijoliswe ekuphuhliseni iziseko zezikolo eMpuma Koloni.

Lo mbutho udize oku emva kokufumana impendulo ebhaliweyo evela kuMphathiswa weMfundo esiSiseko, uSiviwe Gwarube, ephendula umbuzo wepalamente.

Ngokwempendulo yoMphathiswa, le mali ibiyinxalenye yengxowa-mali yeziseko zophuhliso zezikolo, iSchool Infrastructure Backlogs Grant, kwaye yasetyenziswa ngendlela engeyiyo ngexesha leeprojekthi ebeziququzelwa liSebe leMisebenzi yoLuntu eMpuma Koloni.

"Oku asikokuphatha kakubi imali, bubusela. Kwaye amaxhoba ngabantwana besikolo abasafunda kumagumbi okufundela adilikayo, besebenzisa izindlu zangasese ezinemingxuma, okanye banyanzeleke ukuba bafundele phantsi kwemithi," utshilo uRoger Solomons isithethi seBOSA.

USolomons uthe iMpuma Koloni ihleli isezantsi kwimfundo kazwelonke, inelinye lawona mazinga asezantsi okuphumelela imatriki, amanani aphezulu abo bayeka isikolo, kunye neziseko zophuhliso ezisilelayo ukufikelela kweyona migangatho isisiseko. USolomons ubethelele ukuba kwiphondo elikwimeko embi ngolo hlobo, isenti nganye kufuneka ichithelwe ukuphucula iimeko nemigangatho.

"Eyona nto iphazamisa nangakumbi yinto yokhuselo nokungohlwaywa kwabantu kwicandelo lezemfundo, ikhuthazwa ngamandla angaqwalaselwanga emibutho, ngakumbi iSADTU.

''Amaxesha ngamaxesha, siye sibone abantu abanabantu babo bekhuselwa, behamba bebekwa endaweni yokususwa, kwaye bavunyelwe ukuba baqhubeke besilela abantwana bethu ngaphandle kokuphendula ngezenzo zabo. Inkqubo ayibancedi abafundi, iyazikhonza nje," utshilo uSolomons.

Nangona uphando lwangaphakathi luqalisiwe kwaye lo mba uxelwe kwiiHawks, akukabikho mntu utshutshisiweyo, kwaye ityala alikasonjululwa. iBOSA izibophelele ngokuthethana ngqo neeHawks ukufuna uhlaziyo nokwenza izinto elubala.

"Abemi boMzantsi Afrika bafanele ukwazi ukuba: Ngubani obe le mali? Kutheni kungakhange kubekho tshutshiso? Zeziphi iinkqubo ezivumele obu busela ukuba kwenzeke? Iza kubuyiselwa nini imali?" utshilo uSolomons.

IBOSA igxininise ukuzinikela kwayo ekulweleni urhulumente okhusela abantu abasesichengeni, ophumeza izithembiso zakhe, noqinisekisa ukuba amagosa anobuqhophololo ayaziphendulela ngezenzo zawo.

"Izenzo zokubiwa kwekamva labantwana bethu zifuna ukuphendulwa," utshilo uSolomons.

Hope Ntanzi

iBOSA ifuna iimpendulo ngeR5. 2 million yezikolo esetyenziswa gwenxa eMpuma Koloni