Iingxoxo zokulungisa izinto phakathi kommangali okhala ngesincwaso, uAndiswa Mengo, kunye neJaji eyiNtloko uSelby Mbenenge ngo2022 zaye zabhanga emva kokuba uMengo efake imifanekiso (screenshots) yeencoko zakhe noMbenenge kwistatus sakhe kuWhatsApp.

Obu bubungqina obunikwe lingqina leJudicial Conduct Tribunal uDenim Kroqwana, ongumlawuli weMisebenzi yeNkundla eMpuma Koloni.

NgokukaKroqwana, uMengo waya kuye kweyeNkanga ka2022 ngezityholo zakhe. UKroqwana uqinisekise ukuba ngelo xesha, wayephendula entla kuMbenenge kwakunye nabaphathi benkundla kwiOfisi yeJaji eyiNtloko (OCJ).

Ngokwengxelo kaKroqwana, uMengo unxibelelane naye ngomnxeba malunga nesikhalazo sakhe, emva koko uKroqwana wambuza ukuba ufuna ukuqhubeka njani nalo mba.

"Uthe iJaji eyiNtloko imthumelele imiyalezo yesincwaso. Uphinde wakhankanya isiganeko awayengaqinisekanga ngaso ukuba senzeke nge14 okanye nge15 (kweyeNkanga ka2022) kwigumbi leJaji eyiNtloko.

"Uthe ubizwe yiJaji eyiNtloko emagumbini ayo, bathe bakuba bengenile emagumbini, uthi iJaji eyiNtloko yathi makabone ifuthe analo kuye. Ngelo xesha, uthi wabaleka waphuma ngokukhawuleza," utshilo uKroqwana.

NgokukaKroqwana, emva koko [uKroqwana] wabuza uMengo ukuba ufuna uphathwe njani lo mba, uMengo wathi ufuna uMbenenge axolise kwaye kufuneka ayeke ukumthumelela imiyalezo yesincwaso.

UKroqwana uthe uMengo ucele ukuba oku kwenziwe kwindibano apho ezinye iiJaji zasetyhini zinokubakho khona. UKroqwana wathi uza kuququzelela oku emva kokuba efumene isivumelwano sabo bonke abantu ababandakanyekayo. Ngokokutsho kaKroqwana, uMbenenge wathi angavuma kuphela ingxoxo elolu hlobo ukuba le ngxoxo ayibandakanyi abanye abantu.

UKroqwana uthe uMbenenge wacela ukuba ibe nguye kuphela, uKroqwana, noMengo kwiingxoxo; nangona kunjalo, oku akuzange kwenzeke njengoko uMengo waye wafaka iincoko phakathi kwakhe neJaji eyiNtloko kwistatus sakhe kuWhatsApp.

Iingxoxo zaphelela emoyeni ngenxa yoko, utshilo uKroqwana.

Emva koko waye wacebisa uMengo ukuba acinge ngokulandela inkqubo esesikweni, kwaye uKroqwana emva koko waxelela iOCJ ngale nto.

Ityala liyaqhuba ngoMvulo.

Chevon Booysen

Iingxoxo zaphelela emoyeni emva kokuba uMengo edize kuWhatsApp