Isiganeko sokudutyulwa kwamadoda amathathu eSlovo eMthatha
Kudutyulwe amadoda amathathu kusasa ngoLwesithathu eMthatha edutyulwa ngamadoda angaziwayo, omnye wabadutyulweyo uyaziwa ekuhlaleni.
Image: Umfanekiso ogciniweyo
Amapolisa aseMthatha aphanda isiganeko sokudutyulwa kwamadoda amathathu abhaqwe enamanxeba okudutyulwa entloko amanye esemzimbeni ekuzeni kusa ngoLwesithathu, nalapho kwesi sithathu omnye iyindoda eyaziwayo ekuhlaleni.
Oku kwenzeke kwindlu ekwisitalato iGate eSlovo Park, eMthatha, ekuzeni kusa ngezithuba zentsimbi yesine ngoLwesithathu. Aba badutyulweyo baphakathi kweminyaka engamashumi amabini (20) ukuya kumashumi amabini anesithathu (23) ngeminyaka ubudala.
UBrigadier Nobuntu Gantana uthi amaPolisa afikile kwindawo yexhwayelo emva kokubizwa kwawo luluntu xa lusiva izithonga zompu. Uthi ixhoba lokuqala libenamanxeba amabini okudutyulwa entloko, elesibini linenxeba elinye lokudutyulwa entloko namathathu emzimbeni, ze owesithathu wafunyanwa enenxeba elinye lokudutyulwa ngasemva entloko imbumbulu yaphumela ngaphambili.
UGantana uthi unobangela wesi sehlo awukaziwa amaPolisa asaphanda ekwacela nabani na onokuncedisana namaPolisa ngolwazi eze ngaphambili kungenjalo atsalele eMthatha Central okanye ku08600 10111.