UZuma ulwela ukugxothwa kwakhe kwiANC enkundleni
UJacob Zuma usa umbutho wakhe wangaphambili enkundleni kwakhona ukulwa isigqibo sawo sokurhoxisa ubulungu bakhe.
Image: Tumi Pakkies / Independent Newspapers
Idabi lowayesakuba nguMongameli uJacob Zuma lokuhlala elilungu lombutho weANC liphinde lavuselelwa emva kokusa uMongameli uCyril Ramaphosa kunye nombutho wakhe wangaphambili enkundleni ngoLwesine.
UZuma, nowayesakuba nguMongameli weANC noyinkokeli ngoku yeMK Party, ufake isicelo enkundleni ngelizama ukuphikisa ukugxothwa kwakhe kulo mbutho.
Isigqibo sakhe sokusa iANC kunye nenkokeli yayo enkundleni yenzeke emva kokuba ikomiti yoluleko yalo mbutho yamgxotha kweyeKhala ka2024 ngenxa yokuxhasa esidlangalaleni iMK Party phambi konyulo jikelele.
Uqhube wathi amanyathelo oluleko alandelwa yiANC ngo2024 ayengekho mthethweni kwaye anyhasha amalungelo akhe omgaqo-siseko.
Kwintetho eyothusayo, uZuma uvumile ukuba ufuna ukuhlala kwiANC ukuze ayithathele kuye kwaye "ayihlangule" kubunkokeli obukhoyo ngoku.
KwiPodcast, uZuma uvakalise ukuba ufuna ukuhlala ngaphakathi kwiANC ayitshintshe ngaphakathi, esithi ubunkokeli obukhoyo abuyilandeli imigaqo yabasunguli balo mbutho.
Isicelo sikaZuma senkundla, nesifakwe ngoLwesine, ngethuba kukhunjulwa iminyaka engama70 woMqulu weNkululeko, sijonge ukubekela bucala isigqibo seANC sokurhoxisa ubulungu bakhe obuneminyaka engama65.
Abangaphakathi kwiANC bavakalise ukuthandabuza iinjongo zikaZuma, abanye besithi uzama nje ukugxobha umbutho abanye besithi angawulungela lo mbutho phambi koNyulo looMasipala ngo2026.
"Le ndoda (Zuma) ifuna nje ukuchitha imali kumagqwetha nakwiinkundla. Yiyo kanye le nto eqale iMK Party, ngenjongo yokudodobalisa uzinzo kwiANC," utshilo umntu ongaphakathi kwiANC.
Omnye umntu wangaphakathi uveze ukuba umnqweno kaZuma wokuhlala kwiANC umalunga nezibonelelo zakhe zomhlalaphantsi.
"Kukho intetho phakathi kwamaqabane yokutshintsha umgaqo-siseko welizwe malunga nokuhlawulwa kwabo babefudula bengooMongameli ukuze bohluthe imali yomhlalaphantsi kaZuma, kusenokwenzeka esi sesinye isizathu sokuba afune ukuzimanya nombutho," utshilo ongaphakathi kwiANC.