'Siyoyika, kunzima nokulala' - utsho uZodidi onomzi owiswe yimvula

Emva kwezantyalantyala zeemvula ezidlakaze iindawo eziliqela kwiphondo laseMpuma Koloni, abadinga iindawo neempahla zokunxiba bacela uncelo kuRhulumente nasebantwini baseMzantsi Afrika.

Iimvula ezinkulu ebezikhatshwa ngumoya omkhulu zikhokelele ekubhubheni kwabantu abangamashumi alithoba (90), kwadilika izindlu konakala neemoto. Iindawo ezintlithwe ngamandla zizikhukula yiDikolina neSlovo Park, eMthatha. Enye indawo entlithwe ngamandla ziimvula yiGcuwa enabantu abadinga iindawo zokuhlala.

Phakathi kwabantu abashiyeke bengenanto nguZodidi Bukhuni obebeleke usana lwakhe ngethuba encokola neli phephandaba eDikolina abathi yiZwelandile ngoku. UZodidi akasenayo indawo yokuhlala neempahla emva kokuba amanzi omlambo ethe amosha izindlu zabantu abadingayo ngoku.

Ngaphandle kwemiphefumlo yabantu esondele kwikhulu elahlekileyo, amaxhoba afana noZodidi ashiyeke ebalisa umonakalo oqikelelwa kwizigidi zeerandi xa kujongwa izinto zabo zonke ezonakeleyo.

"Asinandlu, asinampahla noomakhelwane bethu babhubhile. Besicela kakhulu kuRhulumente asincede apho akwazi khona," utshilo uZodidi ohlala endaweni yethutyana nabanye abantu abangenazo iindawo zokuhlala eDikolina.

"Asiqondi ukuba sakuphinda sihlale ngohlobo ebesihleli ngalo kule ndawo. Siyoyika, kunzima nokulala emva kwale nto yenzekileyo," utshilo uZodidi. Inenekazi elingumakhelwane laleke umsundulo ngelithi kubi ngoba umzi kabhuti wakhe ushiyeke ulibala.

"Kubi, uthi wakujonga intliziyo ibe buhlungu. Linxeba eli ngoba abantu bashiyeke bengenazinto," utshilo uKhululwa Yebeni. Naye ucela kungenelele uRhulumente kokwenzekileyo. "Abantu baswelekile kwaye nemizimba yabo ayikafunyanwa.

"Sicela uncedo, sibulela ukusinda kwaba bakhoyo abantu," utshilo uYebeni. UMongameli uCyril Ramaphosa, ochithe imini yonke yangoLwesine ogqithileyo, ushiye ethembisile ukuba uza kuthetha nomphathiswa wezimali ukuze kuncedwe abantu.