Ophange imoto ethwal’ imali eQonce ubhaqwe enelinye ityala!
Kubanjwe indoda yaseQonce ziiHawks ephange imali kwimoto ethwal' imali ngoLwesihlanu kwiveki ephelileyo.
Image: istockphoto
Obanjiweyo uSophumelela Devilliers Mani (36) obevele ngoLwesibini kule veki phambi koMantyi waseQonce malunga netyala ajongene nalo lokuxhwila imali kwanokudubula unogada eQonce kuLwesine weveki ephelileyo, kuye kwafumaniseka ukuba unalo nelinye ityala elokufunyanwa enemoto eyayichazwe njengebiweyo eGqeberha.
Ingxelo ephuma kwiiHawks zaseMpuma Koloni ithi uMani wahlasela oonogada ababini benkampani ethwala imali uFidelity Cash Solution beyokuqokelela imali kubhazabhaza wevenkile okumbindi wedolophu eQonce.
Ngokwengxelo ephuma kuWarrant Officer Ndimphiwe Mhlakuvana, uthi unogada uthe xa ephuma ethwele ibhegi ethe qhu yimali ngetroli, umrhanelwa udubule lo nogada wathatha yonke ibhegi wabaleka uyokungena kwimoto yohlobo lweSuzuki Ertiga enombala ongwevu.
Ngokophando olukhawulezileyo, iqela leeHawks elijongene nokuphanda amatyala alolu hlobo liye lava umkhondo ukuba uphi.
UMhlakuvana uthi ngomhla wesixhenxe, eli qela lifike ngqo kwikhaya lakhe eKwalini, eZwelitsha, nelifike umrhanelwa ekhona. Ekugqogqeni kweli qela leeHawks, kufunyenwe imali esisikhaxa esingachazwanga esingamaphepha esene inki nekukholelwa ukuba yile ixhwilwe eQonce koonogada.
Kwakuphando olo kuye kwabhaqwa nemoto iVolkswagen Golf 6, noye umrhanelwa akakwazi ukuveza iimpepha zemoto xa zicelwayo.
LeVW Golf, uphando luye lwabonisa ukuba yimoto eyayichazwe njengebiweyo eGalvendale eGqeberha, uMani wabanjwa.
UMani uvelile ngoLwesibini kule veki ezinkundleni, uza kubuyela kwakhona ngoLwesithathu kwiveki ezayo umhla we18 kweyeSilimela apho aza kube efaka isicelo sebheyile.