Useziseleni elwela ibheyile unyana obulele umama wakhe ngokumasikizi
Oomama belali bezokugcwala emswaneni kwikhaya likaMam' uGwala obulewe ngunyana wakhe eXhorhana eMqanduli bebuliswa nguSodolophu uNyaniso Nelani woMasipala iKing Sabata Dalindyebo.
Image: KSD
Oomama baseXhorhana eMqanduli kwaWadi 22 kuMasipala iKing Sabata Dalindyebo (KSD) bathi noko makangenelele urhulumente futhi esi siganeko senzekileyo makube sesokugqibela, nesisiganeko sokubulawa kukamama uNothozamile Mgengqwa (77) ebulawa ngokungenalusini ngunyana (25) wakhe oliphelo lakhe ebantwaneni bakhe.
UCeba kaWadi 22 kula mmandla, uMnu. Siziba, ebalisa ngemeko abafike kuyo kwikhaya likaGwala, uthe: "Lo mama nowaziwa ngegama likaGwala elalini ubhaqwe kusasa ngoMgqibelo umhla wama31 [kuCanzibe] apha kwakhe egqunywe ngengubo sele ebhubhile enamanxeba ebunzi, entloko, kukwaqhawuke nengalo, indlu igcwele amabala egazi. Ekuqwalaseni kwethu siluluntu, umama lo ubulewe ngezolo ngunyana wakhe ngokokubona imeko."
UMphathiswa woPhuhliso loLuntu eMpuma Koloni, uBukiwe Fanta, ubongoza iiNkosi zasekuhlaleni ekubeni zidlale indima ekuhlaleni kubuyelwe embo. UFanta ukuthethe oku ngethuba inguye, uPetros Majola weKhula Community Development Project kwakunye noSodolophu waseKSD uNyaniso Nelani negqiza lakhe beyogxwala emswaneni kweli khaya kwaye beyokuhewula nesi sehlo.
UFanta uthe: "Lo mama ndiqinisekile ebemqeqeshile lo mntwana enethemba lokuba uyakungcwatywa ngulo mntwana owamcelayo. Singoomama siyabacela abantwana kuThixo, basisipho. Siyahewula sikwakhalima, akakho umntu onokwenza into enje esezingqondweni. IiNkosi ekuhlaleni kufuneka zibenendima eziyidlalayo ekwakhiweni komntu emakhaya, ingakumbi kubantu abangamadoda."
AmaPolisa aseMpuma Koloni azingqinile iingxelo zokubanjwa kwalo nyana walo mama. UCaptain Welile Matyolo uthi unyana ubanjwe ngeCawa emva kwesehlo kwaye sathathwa nesikhali ebesisebenzisa ngethuba ebulala unina wakhe. Lo nyana sele evelile phambi koMantyi eMqanduli nalindele ukuvela ngoLwesine apho aza kube efaka isicelo sebheyile.
Ingxelo ithi esi sehlo kokwesithathu sisenzeka kulo mmandla oko eqalile lo nyaka, kungoko abahlali besithi masingaphindeki kube kanti sesokugqibela.
UNkosi uThanduvuyo Ngwenya, noyiNkosi yale ndawo, uthi lo umama ubhaqwe emva kokuba unyana, nosele engumrhanelwa, eye wayokuboleka umhlakulo nekiriva ebumelwaneni. Xa ebuzwa, wathi uza kungcwaba umama wakhe, batsho abahlali bothuka bamlandela.
UMatyolo uthi unobangela wesi sehlo awukaziwa kodwa uphando lusaqhuba.