UMkambathi Nature Reserve sisibane esigqamileyo kwezokhenketho eMpuma Koloni
Abaphathi boMkambathi Land Trust bazamkele ngovuyo iindaba ezisuka kuRamsar.
Image: Pedro Mapelo
Enye yeendawo zokhenketho ezikhethekileyo kwiphondo leMpuma Koloni inikwe isitampu esiqinisekisa ukubaluleka kwayo kwicandelo lezokhenketho. Oku kuqinisekiswe nguMnu. uVuyani Dayimani, oyiNgqonyela yeArhente yezokhenketho, iEastern Cape Parks & Tourism Agency, emsithweni obubanjelwe eMphekweni Resort, eNgqushwa, ngoLwesihlanu odlulileyo.
IMkambathi Nature Reserve isemhlabeni waMaMpondo kwidolophi yaseLusikisiki. Yindawo enomtsalane ngoba iqhayisa ngomhlaba otyebileyo, onamahlathi, imilambo ekhongozela amanzi aphuma kwiingxangxasi ezingqongwe ngamatyholo nendalo eyahlukileyo ephuma emhlabeni.
Kwiveki ephelileyo, iSebe lezoKhenketho lamkele ingxelo yeRamsar ethe ngokwenene kukho indalo enqabileyo eMkambathi Nature Reserve. Okwenziwe nguRamsar kuqinisekise iMkambathi Nature Reserve njengendawo yokhenketho ephambili eMzantsi Afrika nakwihlabathi lonke jikelele.
Ezi ziindaba ezimnandi kwiMpuma Koloni ezama ukuqinisa uqoqosho lwayo ngezokhenketho. Ulwandle luyenza ibe nomtsalane iMpuma Koloni ephinda idlisele ngamahlathi, izilwanyana, iziqhamo neengxangxasi. "Isiqinisekiso sikaRamsar sithi iMkhambathi Nature Reserve inendalo enqabileyo futhi efumaneka apha eMpuma Koloni kuphela," utshilo uMnu. Dayimani.
UDayimani ethetha neentatheli uthe: "Namhlanje samkela umpoposho othi eli phondo linendawo yokuqala enendalo ekhethekileyo eMzantsi Afrika futhi kukho nezinto ezifumaneka kulo kuphela. Njengokuba sisebenza nabantu bokuhlala abakufutshane kwezi ndawo zokhenketho.
"Xa zilungiswa ziye ziveze amathuba aphucula ukhenketho. Ukuze ukhenketho luphucuke, indalo kufuneka ibuyele kwisimo sayo esihle. Le nto siyifumeneyo iyabonisa ukuba iMpuma Koloni itshila phambili kwicala lendalo," utshilo umphathi wayo iECPTA.
UMnu. Zamokuhle Ndzekeni, onguSihlalo weMkambathi Land Trust, uwamkele ngovuyo umpoposho owenziwe nguRamsar. "Yinto enkulu kakhulu le ngoba iza kuzisa amathuba emisebenzi eluntwini olungqonge indawo yaseMkambathi. Ukuvunywa kwala ndawo yiRamsar kuyasithembisa kakhulu kwicala lokuhluma kokhenketho," utshilo uNdzekeni.