Kubanjwe inkosikazi yaseGqeberha ebizama ukubulala umntwana wayo ngekhoba lebhotile
AmaPolisa aseBhayi abambe inkosikazi (35) ebizama ukubulala unyana (3) wayo ngekhoba lebhotile.
Image: iStock
Iseziseleni inkosikazi (35) yaseShukushukuma eMotherwell, oku kuza emva kokuba ithe yabanjwa ngamaPolisa aseMotherwell eGqeberha malunga nezityholo ejongene nazo zokuzama ukubulala unyana wakhe oneminyaka emithathu ezelwe.
Ngokwengxelo kaCaptain Sandra Janse Van Rensburg, ithi ngorhatya lwangoLwesine umhla wesihlanu kweyeSilimela, amaPolisa afumene ingxelo kumhlali waseShukushukuma obezidlulela ngendlela malunga nomzali ophethe ikhoba lebhotile nozama ukubulala unyana wakhe.
UJanse Van Rensburg uthi lo mhlali ungene ngaphakathi kweli khaya wanqanda le nkosikazi, wabe sele ebiza amaPolisa. Umntwana uye wathathwa lusapho wasiwa esibhedlele eyokufumana unyango nanjengoko ebesele enamanxeba entloko nasebusweni.
Le nkosikazi ibanjiwe iseziseleni kulindeke ukuba ivele phambi koMantyi kuMvulo weveki ezayo.