Bafuna isigidimi sikaRamaphosa sibanike indlebe abantu baseNgcobo!
Abantu baseNgcobo ngethuba beqhankqalaza edolophini ekuqaleni kwale veki.
Image: Facebook
Ithanda phakathi kwabantu baseNgcobo neenkokeli zaseDr A.B. Xuma Local Municipality livuleke ngendlela exakileyo. Oku kucace gca ngoMvulo wale veki ngethuba beqhankqalazela ungabikho kweenkonzo eziya eluntwini.
Abaqhankqalazi bavale iindlela macala onke edolophini yaseNgcobo okwesibini kwisithuba nje senyanga ngenxa yento abayichaza njengokungabikho kolawulo oluhle kwamasipala. Bathi iindlela edolophini ziyaqhekela, iitephu azinawo amanzi ezilalini, iibhulorho ezakhiwayo azide zigqitywe - into eyenza abantwana bawele imilambo ngeenyawo xa besiya ezikolweni.
Njengokuba abaqhankqalazi, bekhokelwa yiSANCO, begqibe kwelokuba baqhubele phambili nokwenza iintshukumo edolophini bathi bakwenza oku ngoba abasenalo ithemba kulawulo lukamasipala. Bafuna uMongameli uCyril Ramaphosa athumele izigidimi zizokwamkela uxwebhu olunezikhalazo zabo.
"Sazithumela izikhalazo zethu kwamasipala, kuRhulumente wephondo nakwisebe likaRhulumente waseMakhaya. INkulubaphathiswa uLubabalo Oscar Mabuyane noMphathiswa uVelenkosini Hlabisa bazamkela izikhalazo zethu - kodwa bathi basidibane nabo eMonti. Sayala lo nto ngoba sifuna beze apha kuthi," utshilo uThembinkosi Butshingi weSANCO.
Omnye umba otshisa ibunzi ofunwa ngabaqhankqalazi kukususwa komphathi kamasipala, uKhathutshelo Mulaudzi. Bamtyhola ngokuqasha abantu asuka nabo eVenda, ukuphatha kakubi imali kamasipala nokungakwazi ukusa iinkonzo ebantwini ngendlela efanelekileyo.
UButshingi uthe uMulaudzi wafaka izihlobo zakhe emsebenzini waphinda wafaka abantu abaqhogene neenkokeli zopolitiko endaweni yamagosa endlela awanqunyanyiswayo kunyaka ophelileyo. Iingxelo zamajelo eendaba zithi kwashenxiswa amagosa endlela aliqela ngenxa yokungasebenzi kakuhle kwesebe lezothutho eDr A.B. Xuma Local Municipality.
USivuyile Myeko, osisithethi sikamasipala, uzichaze njengobuvuvu izityholo ezenziwe ngabaqhankqalazi. "Umasipala uzimisele ukubamba iingxoxo nabantu. Izityholo zokuqeshwa kwabantu abazana nomphathi kamasipala azikho. Abantu baqashwa ngokusemthethweni ngumasipala," utshilo uMyeko kwiGroundUp.