UZuma-Sambudla uxolise kwiMK Party
Ilungu leMK Party ePalamente uDuduzile Zuma-Sambudla ucele uxolo ngoLwesibini emva kokusebenzisa ikhasi lakhe lonxibelelwano uX ngoMvulo ukuthuka uNobhala Jikelele wombutho uFloyd Shivambu.
Kwingxelo yakhe, uZuma-Sambudla uthe: “Njengelungu elizinikeleyo nelihloniphekileyo lombutho iMK Party, ndidlulisa olu xolo kuMongameli uZuma nakwiinkokeli zeMK Party ngezithuko endizibhala kuX kutshanje.”
Ezinye zezinto athe uZuma-Sambudla wazithetha ebhekisa kuShivambu ziquka ukumbiza ngokuba ngumntu “ongenamsebenzi” kunye “noMafikizolo.”
“Ngelixa ndinezimvo ezingagungqiyo nezobuqu, kuquka iinkxalabo malunga nemicimbi yangaphakathi yombutho, iimbono zam malunga nendlela imiba ethile enokusingathwa ngayo ngaphakathi embuthweni, ngakumbi nguNobhala Jikelele wombutho, ndiyaqonda ngokupheleleyo ukuba ezo nkxalabo bekufanele ukuba ziqwalaselwa kusetyenziswa iindlela ezifanelekileyo zangaphakathi, njengoko kuchazwa yimigaqo nemithetho-siseko yalo mbutho. Ndiyavuma ukuba ukuvakalisa ezi zikhalazo esidlangalaleni bekungafanelekanga kwaye oku kusenokuba kujongele phantsi umanyano, imbeko nentlonipho echaza iMK Party,” utshilo uZuma-Sambudla.
Uqhube wathi, “KuMongameli uJacob Zuma weMK Party, iinkokeli zonke, abalandeli beMK Party, kunye nabantu boMzantsi Afrika, ndinqwenela ukuniqinisekisa ukuba andizange ndibe nenjongo yokonakalisa isidima sombutho okanye iinqobo ezisemgangathweni ezibanjwe ngumbutho.”
Ukwathe uzilungiselele kwaye uzimisele ukusebenzisana nazo naziphi na iinkqubo zangaphakathi ezibonwa ziyimfuneko ngumbutho.
UJacob Zuma uzikhabile iintetho zentombi yakhe kwaye wayiyalela ukuba icele uxolo kuShivambu, amalungu, abalandeli beMK Party kunye nabantu baseMzantsi Afrika emva kokuba ebhale izinto ezingathandekiyo ngoShivambu.
UZuma ukwalumkise ngelithi ukusilela ekuthobeleni lo myalelo kuya kukhokelela kwiziphumo ezikhawulezileyo, eziquka ukupheliswa kobulungu bukaZuma-Sambudla kwiMK Party kunye nokurhoxiswa kwakhe kulo mbutho.