Amakhosi ziintshatsheli, ayigwebile indlala yeminyaka elishumi!
uEvidence Makgopa efaka igowuli emdlalweni weNedbank Cup phakathi kweKaizer Chiefs ne'Orlando Pirates.
Image: Yanga Nothanga/Maya Images
Emva kweminyaka elishumi yonke, Amakhosi ziintshatsheli ezintsha zeNedbank Cup. Oku kwenzeke emva kokuba Amakhosi ebethe i'Orlando Pirates ngamagowuli amabini kwelinye emdlalweni obubanjelwe eMoses Mabhida Stadium namhlanje ngorhatya. Amagowuli wempumelelo afakwe nguGaston Sirino noYusurf Maart. Kanti elePirates lifakwe nguEvidence Makgopa.
Siphele isiqingatha sokuqala iyinkwa nenkwa. Omabini amaqela akwazile ukubhalisa ebhodini kwisigaba sokuqala somdlalo eMoses Mabhida Stadium ebigcwele abalandeli abebelinde impumelelo yamaqela wabo. Nakubeni isantya somdlalo besiphantsi, kubonakala ukuba akukho elifuna ukwenza impazamo - iChiefs itsazise igazi kuqala.
Oku kwenzeke emva kokuba uGaston Sirino ebhakuzelise umnatha ngepenela evele emva kokuwiswa kukaPule Mmodi obehlasela phambi kokuwiswa nguDeon Van Rooyen. Kudlule imizuzu emithandathu yaphendula iPirates ngegowuli elihle elifakwe nguEvidence Makgopa ngentloko eyekwe ngabadlali beChiefs.
Emva koko iPirates ilawule umdlalo isiya phambili. Nangona belikhona ithuba lokongeza - kodwa iPirates ayikwazanga. Umdlalo ubungataki iintlantsi njengoko bekulindelwe ngabantu abaninzi. Akukho mathuba acacileyo avelileyo kumacala omabini nakubeni iimpazamo bezikhona macala omabini esiswini.
Ixesha lokuphumla linike abaqeqeshi ukuba babethelele ukubaluleka kokudlala kakuhle. Emva kwexesha elide kungekho nto yenzekayo ecacileyo emdlalweni. UNasreddine Nabi ufake uAshley Du Preez noMduduzi Shabalala. Kwangoko bawuvusile umdlalo.
Emzuzwini wamashumi asixhenxe anethoba, uYusurf Maart ubhakuzelise umnatha ngebhola entle ayidlalelwe nguDu Preez noShabalala. Ihlasele iPirates ikhangela igowuli lokulinganisa - kodwa ngelishwa ayikwazanga ukusebenzisa ithuba elihle lokugqibela aphumelela Amakhosi.