UMbekezeli Mbokazi we'Orlando Pirates no-Iqraam Rayners weMamelodi Sundowns emdlalweni weBetway Premiership obubanjelwe eFNB Stadium emalanga ngeCawe edlulileyo.
Image: Yanga Nothanga/Maya Images
Ijoni elithembekileyo kwamatshwa kwi'Orlando Pirates, uMbekezeli Mbokazi, lidize okuncede iqela emdlalweni omkhulu obukwimpelaveki egqithileyo. IPirates isancumile emva kokubetha iMamelodi Sundowns ngamagowuli amabini kwelinye emdlalweni weBetway Premiership obuseFNB Stadium emalanga ngeCawe.
Okwenza impumelelo yePirates ibe nencasa ngakumbi kukuba iphindisile kwiSundowns ebiyibethe ngamagowuli amane kwelinye kutshanje yaphinda yacutha umsantsa ehamba phambili ngawo kwiBetway Premiership. Nangona uRelebohile Mofokeng enze umahluko obonakalayo ngamagowuli amabini awafake kwisigaba sokuqala somdlalo obuseSoweto - kodwa uMbokazi ngomnye wabadlali abenze indiba enkulu kakhulu.
UMbokazi ukwazile ukuthintela uLucas Riveiro ogoduke engalifumananga igowuli ebelilangazelela emdlalweni. Ngumsebenzi oncomekayo lowo owenziwe nguMbokazi odlale umdlalo wakhe wesithathu emva kokunyuselwa kwakhe kwiMultiChoice Diski Challenge. Ukubethwa kweSundowns kukhuthaze iPirates esazimsele ukulwanangona isashiywa ngeshumi elinesihlanu lonke lamanqaku yiSundowns.
Ethetha emva komdlalo, uMbokazi uthe umqeqeshi wePirates uye wabaxelela bengabadlali ukuba kufuneka bazilwele ebaleni ngoba bajongene neqela eliyingozi. "Sidlale kakuhle neSundowns ngoba sichithe iveki yonke sizilungiselela ukudlala nayo. Besisazi kakuhle ukuba iza kusiqwenga," utshilo uMbokazi ongomnye wabadlali ekuthenjelwe ngabo ngoku yiPirates.
Nakubeni abantu abaninzi bothukile yindlela iSundowns ebethwe ngayo yiPirates - kodwa uJose Riveiro ebetshilo phambi komdlalo ukuba iqela lakhe liza kulwela ukuphumelela umdlalo. "Umqeqeshi uthe kufuneka silungele ukufela ebaleni ukuba sifuna ukuphumelela umdlalo. Sikwazile ukufumana amagowuli amabini kwangoko emdlalweni. Isincedile kakhulu ngoba isiqingatha sesibini besinzima. Iifolosi zethu ziwenzile umsebenzi kakuhle, kuye kwanyanzeleka ukuba nathi sense owethu umsebenzi phaya emva. Ngelishwa ikwazile ukufaka igowuli iSundowns - kodwa siwamkela ngovuyo amanqaku amathathu esiwathathe kwiSundowns," utshilo uMbokazi.
Related Topics: