ICity Tigers iphumelele ngenxa yokuzimisela kwitumente yaseDutywa
Umphathi weCity Tigers, uKideo Magungqu, ubaqhwabele izandla abadlali beqela lakhe emva kokuzuza impumelelo ebalulekileyo kutshanje. Oku kwenzeke emva kokuba iCity Tigers yelali yakuTyhothi ibethe iVukuhambe FC ngegowuli elinye eqandeni emdlalweni wokugqibela wetumente enkulu ebibanjelwe eChizele, eDutywa, ekuqaleni kwalo nyaka mtsha.
Unyaka nonyaka, ulutsha lweelali eziphantsi kwenqila yaseChizele lonwabela iiholide zokuphela nezokuqala konyaka omtsha ngemidlalo yebhola ekhatywayo nebhola yomnyazi edlalwa ngamantombazana. Unyaka ka2024 uvalwe ngengxikela yeyona tumente enkulu eDutywa eye yaphumela kunyaka omtsha.
Amaqela athathe inkxaxheba aquka iHungry Lion, iCity Tigers, iRed Lion, iWestern Chiefs, iHome Defender, iYizo Yizo FC neNewcastle FC. Liqela lakuTyhothi elithe latshatshela kwisiqendu setumente esongwe kutshanje emva kokudlula emaqeleni alushica aquke iWestern Chiefs neNewcastle phambi kokubetha iVukuhambe FC emdlalweni wokuvala odlalwe ngomhla wesibini kule nyanga yoMqungu ka2025.
Onke amaqela athathe inxaxheba kwitumente ebiseChizele adlale ngokukhulu ukuzimisela. Iqela ngalinye belingena ebaleni lidlalele ukuphumelela indebe ekhatshwe yimali. Noxa ulutsha luzimisele – kodwa kukho ingxaki yamabala amabi ekunzima kakhulu ukudlalela kuwo eChizele.
Kudlalelwa kuwo nje kuba ingekho enye indawo enokusetyenziswa. Nangona kunjalo, uKideo uthe iCity Tigers iye emdlalweni wokugqibela likhona ithemba lokuzuza impumelelo. Ithemba lidalwe kukuzimisela okubonakaliswe ngabadlali besazilolonga.
“Ndizive ndichulumance kakhulu emva kokuphumelela kweqela lethu,” utshilo uMagungqu ethetha nentatheli yeli phephandaba. Ukuphumelela kweqela lakhe akothusanga ngoba lelinye lamaqela adlale kakuhle futhi enabadlali abasemgangathweni ophezulu.
“Basebenze kakhulu abafana bam. Andazi ukuba ndingathetha ndithini ngabo ngoba bazimisele besajima. Ebengelulanga amaqela esidlale nawo, ngakumbi umdlalo esiwudlale neWestern Chiefs phambi kowokugqibela. Kodwa ke abafana bam bakwazile ukuphumelela,” utshilo uMagungqu weCity Tigers.