UseRashiya uAntonio Guterres

UNobhala Jikelele wombutho weZizwe eziManyeneyo, uAntonio Guterres wothuse uninzi kwihlabathi ngethuba ezimasa inkomfa yeentsuku ezintathu yeBRICS ebanjelwe eKazan, eRashiya.

UGuterres ubonwe njengobonakalisa icala ami kulo kumcimbi wokungaboni ngasonye kumazwe amakhulu kwihlabathi aquka iMelika neRashiya.

Ekuqaleni kwalo nyaka, uGuterres ebemenywe kwinkomfa ebikhokelwe lilizwe laseMelika ebijoliswe ukusombulula ingxaki yemfazwe ephakathi kweRashiya neUkraine.

Ingxelo ithi, akakhange avume ukuzimasa le nkomfa uGuterres ngenxa yezizathu ezaziwa nguye. Iintatheli zezopolitiko, abahlalutyi bezopolitiko neenkokheli zopolitiko bathetha izinto ezahlukeneyo ngesi sigqibo.

Umbutho weZizwe eziManyeneyo okhokelwa nguGuterres uxhomekeke ngokumandla kwimali yenkxaso ephuma kumazwe ehlabathi, kwaye ilizwe laseMelika lihamba phambili. Imali eninzi eqinisa umsebenzi weZizwe eziManyeneyo iphuma kwilizwe laseMelika.

Uninzi lweenkokheli, ingakumbi ooNobhala Jikelele balo mbutho, bebengoothobela sikutyele belizwe laseMelika iminyaka emininzi. Ukuzimasa kukaGuterres le nkomfa kuthetha ukuba ngenene ubunganga belizwe laseMelika busengxaki.

Kwelinye icala, kucacisa ukuba uGuterres akananjongo yokuqhubeka njengoSihlalo wombutho weZizwe eziManyeneyo.

Inkomfa yeBRICS iqale ngomhla wamashumi amabini anesibini kule nyanga kwaye kulindeleke ukuba ikhule inkxaso yalo mbutho kumazwe ehlabathi. Kukho iingxelo zokuba ilizwe laseSaudi Arabia liphakathi kwamazwe aza kuzimanya nalo mbutho.

UMongameli weli, uCyril Ramaphosa, uthi ilizwe laseRashiya ulibona njengelizwe elibaluleke kakhulu kubudlelwane beli namazwe angamalungu weBRICS.

Amajoni wokuqala woMkhonto weSizwe aqeqeshwa kwela lizwe laseRashiya kwaye anikwa inkxaso ukukhulisa lo mbutho. Le nkomfa kulindeleke ukuba ivalwe ngomhla wamashumi amabini anesine kule nyanga.