UMongameli weRoyal AM nosomashishini owaziwayo waseThekwini, uShauwn Mkhize, uxolisile kubadlali bakhe emva kokuba bengahlawulwanga imirholo yabo ngexesha leziyunguma ngenyanga yoMnga.
Ukungahlawulwa kubangele ukuba uhlehliswe umdlalo wabo weBetway Premiership neChippa United eGqeberha, okukhokelele kuqikelelo lokuba iqela lijongene nekamva elingaqinisekanga njengoko iingxaki zalo zemali zisanda.
Iingxelo zangaphambili bezisithi umdlalo umisiwe ngenxa yabadlali abaqhankqalazayo, nangona kunjalo, oku bekungenjalo, ngokutsho kombuthi wabadlali bebhola ekhatywayo eMzantsi Afrika. Ngokwengxelo kaSekela Mongameli wombutho uTebogo Monyai, abadlali bacetyiswe ukuba bangabuyeli ngoku ejimini nanjengoko iqela lisakhangela imali yokuhlawula imivuzo yabo yenyanga yoMnga.
NgoLwesithathu, uMkhize, ekuvakala ukuba utyala ababuthi berhafi imali ekumashumi amane ezigidi zeerandi (R40 million), uvumile ukuba eli qela ngoku liphantsi kolawulo lwethutyana lwabakwaSARS nanjengoko bejonge ukulihlawula lonke ityala lerhafu.
“Iqela labaphathi beqela, elikhokelwa nguMphathi wethu kunye noManejala, basebenza nzima kunye nomlawuli wexeshana ukufumana iimvume eziyimfuneko zokukhupha imali yemivuzo,” utshilo uMkhize kwingxelo.
“Ibisoloko ingumgaqo weRoyal AM ukubeka phambili intlalo-ntle yabasebenzi bethu, kwaye sihlala sizinikele ekuthobeleni lo mgaqo ngaphandle kwemingeni ekhoyo,” uqhube watsho.
“Siyawubulela umonde nenkxaso yabadlali bethu, abasebenzi kunye neentsapho zabo ngeli xesha linzima. Ukongeza, sibulela abalandeli bethu, abaxhasi bethu, kunye nabathathi-nxaxheba ngokubanzi ngentembeko nokunyaniseka kwabo okungagungqiyo.
“IRoyal AM izimisele ukugcina ingqibelelo yeqela kunye nokuqinisekisa impumelelo yayo yexesha elide. Sihleli kwithemba lokuba le meko iza kusonjululwa kungekudala, kwaye siya kubonelela ngohlaziyo ngexesha njengoko uphuhliso luqhubeka.”
Kunyaka ophelileyo, eli qela layalelwa liqumrhu elilawula ibhola ekhatywayo kwihlabathi iFIFA ukuba lihlawule uSamir Nurkovic imali ezizigidi ezilishumi elinesihlanu zeerandi (R15 million) kunye noRicardo Nascimento iR600 000 eyimali eyayiyimivuzo engahlawulwanga okanye ibe sesichengeni sokugxothwa kwiPSL.
Eli bali liqale lavela kwi-IOL.
UDonell Mbele otyholwa ngokudlwengula ukhululwe ngebheyile yeR1000