UMphathiswa uXolile Nqatha uveza okubangela umlo ophakathi koonoteksi neebhasi

Kange kubekho nzolo kwiidolophi ezimbini kwiphondo leMpuma Koloni kule veki ngenxa yogwayimbo olukhatshwe ludushe oluqhutywe ngoonoteksi. Bathe abazukulayisha kwidolophi yaseNgcobo. Ngenxa yalo nto abantu abaninzi bakhe balala edolophini ngenxa yokuswela izinto zokugoduka.

Khange kube kudala, oonoteksi bavale indlela ngezigadla kwidolophi yaseDutywa. Angenelele amapolisa yavulwa indlela - kodwa abantu khange bathuthwe eDutywa kule veki iintsuku eziliqela. Akukabikho themba lokuhamba kakuhle kwezinto ngoba akukho zithuthi ezisa abantu edolophini futhi neevenkile zivaliwe ngoba abasebenzi abakwazi ukuya emisebenzini.

UMphathiswa weZothutho kwiphondo leMpuma Koloni, uXolile Nqatha, wenze utsi gxada eNgcobo - apho abambe khona intlanganiso neenkokeli zikamasipala nezoonoteksi. Emva kwalo ntlanganiso, uNqatha uveze ukuba oonoteksi bakhalazela iibhasi ezilayisha abantu kwiindawo ezingenalo ilungelo kuzo ezinye zazo zibe zingenawo amaphepha azivumelayo ukulayisha abantu.

Khange acacise uMphathiswa ukuba iibhasi zihamba njani engekho amaphepha azigunyazisayo ilisebe lakhe elijongene nalo nto. "Siphuma kule ntlanganiso sivene ukuba xa kukho ingxaki, makuhlonitshwe umgaqosiseko nemithetho yelizwe. Akukho mntu omakanyhashe amalungelo wabanye abantu xa kukho into emkhathazileyo," utshilo uNqatha ekuqaleni kwale veki eNgcobo.

"Siyasiva sona isikhalo sabo (oonoteksi). Bathi kuhamba iibhasi ezininzi ezika-Intercape apha eMpuma Koloni ezinye zazo zinganawo amaphepha okulayisha. Lo nto ibathathela imali njengoosomashishini abasakhasayo abangekaxhaswa nguRhulumente ngezibonelelo.

"Yinto esaqwalaselwayo nguRhulumente. Kodwa nokuba kunjalo, izinto mazibuyele esiqhelweni. Sivumelene nabo ukuba abantu mabahambe ngokukhululeka futhi neevenkile zivulwe. Sonke singabemi belizwe, nakweli phondo, kuyanyanzeleka ukuba siwuthobele umthetho.

"Masingophuli umthetho kuba sikhathazekile futhi namapolisa masiwavumele enze umsebenzi wawo. Nangona siyihlonipha inkundla - kodwa sixhalatyiswe sisigqibo esithe amapolisa makazigade endleleni iibhasi zika-Intercape. Sisigqibo esisibona njengelishwa ngoba siza nento uRhulumente angazukwazi ukuyifeza," utshilo uNqatha.

"Umsebenzi wamapolisa kukukhusela bonke abantu. Ngoku xa uza kuba nesigqibo esithi gada iibhasi zika-Intercape, ngomso kuza kuvela enye isithi mayigadwe. Lo nto ingangakwazi ukuphumelela ngoba umgaqosiseko uthi makugadwe wonke umntu kweli lizwe endaweni yokugadwa kwenkampani ethile. Makungabikho amapolisa agada inkampani ethile. Yiyo le nto inkampani nganye ikwazi ukuziqeshela oonogada bayo.

"Ayingomsebenzi wamapolisa ukugada inkampani kazipeqengeshe. Akhona amanyathelo athathwe ngumasipala ukuze izinto zilunge. Nathi siliphondo siza kuzama ukuqinisekisa ukuba zonke iibhasi zinamaphephamvume. Sinabo ubungqina obuvezayo ukuba ezinye iibhasi azinawo amaphepha azivumelayo ukuba zithuthe abantu eMpuma Koloni. Amapolisa makenze umsebenzi wawo. Ibhasi engenalungelo lokulayisha mayithathelwe amanyathelo," utshilo uNqatha.