Uluntu lwaseBolotwa luxhotyiswe ngolwazi kwidabi lokulwa nentsholongwane kagawulayo
Abahlali baseBolotwa bafundiswe ngentsholongwane kagawulayo kutshanje.
Image: Mbhashe Local Municipality
Abahlali baseBolotwa ephantsi koMasipala waseMbhashe baxhotyiswe ngolwazi abaludingayo ukuze bazikhusele kunye nabantu babo kusulelo lwentsholongwane kagawulayo (HIV/AIDS) nezigulo ezinxulumene noko.
Izolo, ngoLwesine, uMasipala waseMbhashe ubambisene neSebe lezeMpilo udibanise uluntu lwaseBolotwa kumsitho onentsingiselo eUpper Bolotwa JSS. Lo msitho ubulungiselelwe ukomeleza iinzame zokulwa nentsholongwane kagawulayo nokuxhasa impilontle yoluntu.
Uceba uXoliswa Tyhodana onguSihlalo weqela lamanina kule ngingqi, ubethelele ukuba idabi lokulwa ugawulayo lixhomekeke kuluntu olumanyeneyo.
UTyhodana ukhuthaze abahlali ukuba bamanyane ukuxhasa abo baphila nentsholongwane kagawulayo, ebalula ukubaluleka kovelwano nokuqondana ekwakheni uluntu olomeleleyo.
Ukwathethe ngomba wobundlobongela obusekelwe kwisini kunye nezenzo zayo ezifana nodlwengulo, ethetha ngobungozi bezi ziganeko nendlela ezingonyusa usulelo lwentsholongwane. Uqukumbele ngokubongoza uluntu ukuba luchaze amatyala alolu hlobo ukuqinisekisa ukhuseleko, ubulungisa, kunye nokuba abenzi bobubi baphendulela izenzo zabo.
UMasipala waseMbhashe kwingxelo uthe kulo msitho abantu bathathe inxaxheba kwiingxoxo ezimalunga nothintelo, iindlela zonyango, kunye neenkonzo zenkxaso abanazo.
"Ezi ngxoxo azizange zinike ulwazi olubalulekileyo nje kuphela kodwa zomeleze nomyalezo wokuba akukho mntu ufanele ajongane neHIV/AIDS yedwa.
"Ngokusingatha amaphulo afana neli, uMasipala uyaqhubekeka ukukhuthaza ithemba, ukukhuthaza ukuqonda, nokomeleza uthungelwano lokukhathalela abantu kunye neentsapho ezichatshazelwe yiHIV/AIDS," utshilo uMasipala.
Umhla wokuqala kweyoMnga waziwa njengoSuku lweHlabathi lukaGawulayo. Ngokwenkqubo yeZizwe eziManyeneyo ejongene neHIV/AIDS (UNAIDS), bekukho abantu abangaphezulu kwesigidi (1.3 million) abosulelwe yintsholongwane kagawulayo kwihlabathi jikelele, ngelixa awona manani mva nje, ebonisa ukuba phakathi kuka2023 kunye no2024, bekukho abantu abayi178 000 abosulelwe yintsholongwane eMzantsi Afrika.
Olu suku lusuku lokukhumbula abantu esibathandayo ababulawa ngugawulayo, ukukhuthaza nokunika inkxaso kwabo baphila nentsholongwane kagawulayo ngoku nokufundisa uluntu ngendlela yokuzikhusela kwintsholongwane.
Njengenxalenye yemisebenzi yokuhlakulela olu suku, iSebe lezeMpilo eMpuma Koloni libambisene neUNICEF kunye neLithemba lithe kutshanje liququzelele inkqubo yokwabelana ngolwazi egxile kuthintelo lwentsholongwane, ukuthobela ukutya iipilisi kunye nempilo ngokwesondo kwiholo iDaku Hall, kwaZakhele.
Umsitho wePhondo leMpuma Koloni woSuku lweHlabathi lukaGawulayo uza kubanjelwa eLillian Ngoyi Community Sports Centre, kwaZakhele, eGqeberha, ngoMvulo, umhla wokuqala kweyoMnga 2025 phantsi komxholo othi: “Iinzame ezihlaziyiweyo kunye nezibophelelo ezizinzileyo zokuphelisa ugawulayo.”