Abantu baseMdantsane babuyiselwe isidima ngeziqinisekiso zobunini bezindlu
Abantu baseMdantsane bonwabile bephethe iziqinisekiso zobunini bezindlu abazifumeneyo.
Image: BCMM
IKrisimesi ifike phambi kwexesha kumakhulu abantu baseMdantsane, eMonti, abafumene iziqinisekiso zobunini bezindlu.
Eli ibiliphulo lenkqubo lokunikezela ngeziqinisekiso zobunini bezindlu yeSebe lokuHlaliswa koLuntu ngokubambisane noMasipala oMbaxa waseBuffalo City (BCMM) neyenzeke ngoLwesine umhla wama27 kweyeNkanga 2025.
UMphathiswa wezokuHlaliswa koLuntu kuzwelonke, uThembi Simelane, uMphathiswa wezokuHlaliswa koLuntu eMpuma Koloni, uSiphokazi Mani-Lusithi kunye noSodolophu woMasipala waseBCMM, uPrincess Faku, batyelele abantu abadala kwizindlu zabo ezakhiwe ngurhulumente kwaZone 18 eMdantsane ngeenjongo zokunikezela ngeziqinisekiso zobunini bezindlu kumakhaya abo.
UMani-Lusithi uthe bayayazi imfuneko yezindlu kodwa abo bahleli kumhlaba abangenalo ilungelo lawo baza kukhutshwa.
"SiliSebe lokuHlaliswa koLuntu sifuna ukubongoza abantu bakuthi – siyayazi isidingo sezindlu sikhulu kwaye siyakhula kodwa sifuna ukucebisa abantu ukuba umntu makathathe umhlaba nendlu aselungelweni ukuyifumana. Kuba apho umntu engene kwindlu engekho selungelweni ukuyifumana kuza kufuneka ephumile abe echithe iimali zakhe kumhlaba angenalungelo kuwo.
"SiliSebe sifuna ukuqinisekisa ukuba sifaka iziqinisekiso zobunini bezindlu koomasitandi bokwenene, kubantu abaselungelweni lokuhlala kwezi zindlu. Yiloo nto sizokukhupha iziqinisekiso zobunini bezindlu eziyi1200 kuba sifuna ukunikezela iziqinisekiso kubantu abaselungelweni ukuqinisekisa sibuyisela isidima sabantu bakuthi ngomhlaba. Siqinisekise ukuba amakhaya anelifa," utshilo uMani-Lusithi.
UMphathiswa wezokuHlaliswa koLuntu kuzwelonke, uThembi Simelane, uMphathiswa wezokuHlaliswa koLuntu eMpuma Koloni, uSiphokazi Mani-Lusithi kunye noSodolophu woMasipala waseBCMM, uPrincess Faku, bephelekwa ngabanye abantu ngethuba behlola izindlu ezakhiwe eZone 18 eMdantsane.
Image: BCMM
USimelane, Mani-Lusithi kunye noFaku baqhube uhlolo lweprojekthi yezindlu eZone 18, eMdantsane. Le projekthi kulindeleke ukuba inikezele ngezindlu eziyi1500.
"Iprojekthi enje ibaluleke kakhulu. Kufuneka ndibabulele bobabini, uMphathiswa noSodolophu – okokuqala, ngokuchonga indawo entle kangaka, njengoko ubona ukuba kuhlawulwe imali eninzi ukuze kufunyanwe le ndawo. Asifuni ukubeka abantu bakuthi apho kungekho mntu ufuna ukuhlala khona, kwanam ndingahlala apha.
"Okwesibini, iinkonzo, iziseko zophuhliso, yonke into – kuquka nezindlu. Inqanaba lokuqala lombane, iipali sele zinyukile, ngethemba lamakhulu amane (400) okuqala ukuba afumane umbane wawo nge13 kweyoMnga," utshilo uSimelane.
USimelane ukwathe oonogada bakhona ukuqinisekisa ukuba abo bangenako ukuhlala ezindlini okwangoku izindlu zabo ziyakhuselwa ukunciphisa ukonakaliswa.
USimelane ukwawuqhwabele izandla umsebenzi owenziwe ngoonokontraka, esithi izindlu zicocekile, amanzi akhona kwaye nombane uza kuvulwa kwinyanga ezayo nguSodolophu.
"Siyabavuyela abantu baseBuffalo City, sinethemba lokuba baya kuyixabisa le projekthi. Ezi zindlu zezabo bazinikwe ngurhulumente, okubalulekileyo kukuba bazikhathalele kwaye bazigcine."
Kusenjalo, abanye abaxhamli banikwe iziqinisekiso zabo kwiholo yoluntu ekwaNU10 eMdantsane. Ethetha kumsitho wokunikezelwa kwezi ziqinisekiso zobunini bezindlu, uSodolophu uFaku, uthe: "Namhlanje, sibhiyozela ubunini bamakhaya. Kubaxhamli bethu, olu xwebhu uya kulufumana namhlanje ayilophetshana nje, lisango lamathuba."
Izindlu ezakhiwe kwaZone 18 eMdantsane, eMonti.
Image: BCMM
UFaku uthe ezi ziqinisekiso zinika abantu ukhuseleko, ukufikelela kwiimakhethe zezindlu, ilungelo lokuphucula, ukwandisa, kunye nokutyala imali kumakhaya abo. "Okona kubaluleke kakhulu, zinika abantwana benu kunye nezizukulwana ezizayo into abangayizuza; into ephethe igama lakho, umzamo wakho, kunye nelifa lakho," utshilo.
Uqhube wathi, "Njengeenkokeli zoMasipala oMbaxa waseBuffalo City, siyazibophelela ekukhawuleziseni unikezelo lwezindlu, ukukhutshwa kweziqinisekiso zobunini bezindlu, siphucule umgangatho wokuhlaliswa kwabantu nokuqinisekisa ukuba uluntu ngalunye lufikelela kwiinkonzo ezifana namanzi, ugutyulo, umbane kunye neendlela. Siza kuqhubeka sisebenzisana noogxa bethu bephondo nabakazwelonke, kuba unikezelo lweenkonzo zokuhlaliswa koluntu luxanduva ekwabelwana ngalo olufuna umanyano nokuzimisela."
Konke oku kuyinxalenye yephulo likazwelonke lokukhulisa ubunini bezindlu ngezindlu ezixhaswa ngurhulumente nekujoliswe ekunikezeleni ngeziqinisekiso zobunini bezindlu ezingamashumi asibhozo amawaka (80 000) ekupheleni kwesicwangciso seMedium Term Development Plan (MTDP).