Ipolisa elinemilenze emine uAdze liqhawe
Ipolisa elinemilenze emine uAdze obhaqe umrhanelwa omnye kwabathathu kwihlathi eliseKenton-On-Sea ngeCawe emva kokuqhekeza ivenkile.
Image: SAPS
Yinja yamaPolisa eneminyaka esixhenxe (7) kuphela egama linguAdze ebeliqhawe ngeCawe esisuka kuyo emva kokuba ivumbulule umrhanelwa omnye kwabathathu ebezimele kwihlathi eliseKentoni kude kufuphi naseMnyameni emva kokuba beqhekeze ivenkile ekwilokishi iMarselle.
Aba barhanelwa nguThamsanqa David (33), Alizwa Tsitsi (19), kwakunye noAnele Tshukulana (25) nabathe tshe kancinci phambi koMantyi eMnyameni ngoLwesibini kule veki bevela malunga namatyala abajongene nawo, elokuzama ukubulala kwanokuqhekeza ishishini.
Aba barhanelwa bangaphakathi eziseleni nalapho eli tyala liza kuthunyelwa kuMantyi waseKentoni nabazabe befaka isicelo sebheyile kwakule veki.
Ngokwengxelo yesithethi samaPolisa aseMpuma Koloni, uWarrant Officer Majola Nkohli, ithi aba barhanelwa ukufika kwabo kule venkile badubule umnikazi wayo emva koko bathatha nesixa semali kwanezinto ezimbalwa zokuthengisa.
UMajola uthi amaPolisa kwakunye neenkampani zoonogada zabucala zaseKentoni zikwazile ukubamba ababini abarhanelwa kude kufuphi nevenkile leyo. Owesithathu umrhanelwa uye wayokuncathama ehlathini nekulapho amaPolisa aye ayokuthatha igosa ebelingaphangelanga elinemilenze emine elinguAdze.
"UAdze khange amoshe xesha ukungena kwakhe ehlathini elandela umkhondo womrhanelwa wambhaqa kwangoko embhaqa enecuba kwakunye nomatshini wemali (speedpoint) aziphange evenkileni," utshilo uMajola.