Kuhlehlisiwe ukugwetywa kowabulala uSindiso Magaqa
USindiso Magaqa, owayenguceba weANC, wadutyulwa wabhubha nguSibusiso Ncengwa ngo2017 eMzimkhulu.
Image: Facebook
Ukuwiswa kwesigwebo kwityala lokubulawa kukaSindiso Magaqa kumiselwe umhla wesixhenxe kule nyanga yeKhala. Oku kuza emva kweengxoxo eqhubeke eNkundleni ePhakamileyo, ePietermaritzburg, izolo [ngoMvulo].
USibusiso Ncengwa, obekade engumrhanelwa ophambili, wafunyanwa enetyala lokubulala uMagaqa owayenguceba kumasipala waseMzimkhulu kwiphondo laKwaZulu-Natal. Wabulawa ngo2017 emva kokuchasa kwakhe urhwaphilizo esidlangalaleni olwalusenziwa kwamasipala awayemsebenzela.
UNcengwa uwavume onke amatyala awabekwe enkundleni aquka elokubulala, ukuzama ukubulala, ukonakalisa impahla nokuba nompu neembumbulo ezingekho semthethweni. Ngokobungqina obuchazelwe inkundla, uMagaqa wadutyulwa enabanye ooceba ababini emotweni ababehamba ngayo ngomhla welishwa.
"Salinda imoto awayehamba ngayo ngoba sasikhangela ithuba lokumbulala. Ndaphuma ndamdubula ngompu omkhulu esemotweni," utshilo uNcengwa ebalisela inkundla.
Ukubulawa kukaMagaqa, owayenguNobhala weANC Youth League phambi kokuba nguceba, kwaba ngundabamlonyeni eMzantsi Afrika ngoba yayilixesha lokuphakama kweziganeko zokubulawa kwabantu abakwezopolitiko KwaZulu-Natal.
Umama kaSindiso uvakalise ukuxheleka komphefumlo wakhe kukubulawa komntana wakhe okwenzeka kwiminyaka esibhozo eyadlulayo. Ingxelo ebhaliweyo efundwe enkundleni ithe umama wakhe ulila iinyembezi oko xa embona ethivini.
Ababulali bakaMagaqa babutshabalalisa ubungqina ngokutshisa imoto emva kokumbulala ngompu ongekho semthethweni. UMnu. Andrew Matlamela, oligqwetha likaNcengwa, ucele umgwebi ukuba angamniki isigwebo sobomi entolongweni umbulali.
Izizathu azibeke phambili uthe uNcengwa uyithethe yonke inyaniso enkundleni futhi uxele namagama wabantu abamthengayo ukuba abulale uMagaqa. Ngaphezulu, uNcengwa sele echithe iminyaka esibhozo yonke ethothoza entolongweni.