Uvela enkundleni odlwengule ixhegwazana (80), wakugqiba woyiswa bubuthongo!
Indoda, 28, eyadlwengula ixhegokazi, 80, kulindeleke ukuba ivele enkundleni ngetyala lokudlwengula.
Image: Umfanekiso ogciniweyo
Kubanjwe kwavalelwa indoda enamashumi amabini anesibhozo eminyaka (28), emva kokudlwengulwa kwexhegwazana elinamashumi asibhozo eminyaka (80), ze le ndoda yabiwa bubuthongo emva koko, ngentsasa yangoMgqibelo, eNgcoya, eLusikisiki.
Ukubanjwa kwale le ndoda ibe luncedo lwabahlali bale lali yakwaNgcoya.
Ngokwengxelo yesithethi samapolisa uCaptain Welile Matyolo, kusolwa ukuba ixhoba belilele nabazukulwana balo, nalapho omdala oneminyaka esibhozo (8), waye waqaphela umrhanelwa nobesele engaphakathi endlini. Umrhanelwa uye wayalela ixhoba ngesoyikiso sokuba lingakhali, ze walidlwengula, akugqiba webiwa bubuthongo.
Ingxelo iqhuba ithi, abahlali bathe babizelwa kweli khaya, bafumana umrhanelwa elele. Abahlali baye balibamba ixhoba de kwafika amapolisa, nafike ambeka ityala lokudlwengula umrhanelwa lowo.
Umrhanelwa uza kuvela namhlanje, uMvulo, kwiNkundla kaMantyi eLusikisiki, ngesityholo sokudlwengula.
UMkomishinala wamaPolisa obambeleyo weSithili saseOR Tambo, uBrigadier Vukile Ntuli, uncome abahlali ngokuphatha lo mba ngendlela ephucukileyo, watsho ebakhuthaza ukuba basoloko bencedisana namapolisa ukulwa ulwaphulomthetho kule ndawo.