Liseziseleni ipolisa ngezityholo zorhwaphilizo!
Ipolisa elikwinqanaba lokuba yiSajini, nelineminyaka engamashumi amane (40), lithe lavela phambi kwenkundla yamatyala eCarthcart, ngoLwesibini, umhla wesibhozo kwinyanga yeDwarha, ngezityholo zorhwaphilizo, ukunyoba, kwakunye nokuba imfuyo.
Kwiphulo lokulwa norhwaphilizo esipoliseni, amalungu ecandelo le Anti-Corruption athe alandelela iinkcukacha athe azifumana malunga nepolisa laseTylden elityholwa ngokubandakanyeka kubiwo lwemfuyo.
Ngokwengxelo ekhutshwe ngamaPolisa, ithi eli polisa lithe leba iibhokhwe ezine nexabiso lazo iyiR11 000, nalapho lathi lasebenzisa imoto yomsebenzi ukwenza oku. Ukanti liye kamva lakhupha imali yokunyoba lowo wathi walibona lisenza esi senzo. Ukanti uphando olunzulu lulo oluthe lakhokelela ekubeni libanjwe eli polisa ngeCawa, eKomani.
Umrhanelwa uvele phambi kwenkundla yamatyala eCarthcart ngoLwesibini, umhla wesibhozo kule nyanga. Ukanti usagcinwe eluvalelweni, de aphinde avele enkundleni kwakhona ngomhla weshumi elinesixhenxe kule nyanga yeDwarha, nalapho aza kuthi afake isicelo sakhe sebheyile.
UMkomishinala wamaPolisa kwiPhondo leMpuma Koloni, uLieutenant General Nomthetheleli Mene, uzincomile iinzame ezithe zenziwa luluntu ekuhlaleni ukuqinisekisa ukuba amapolisa abandakanyeka kurhwaphilizo aziswa ngaphambili.
“Oku kuthumela isilumkiso kuluntu namaPolisa ukuba iSAPS iza kuluncothula neengcambu urhwaphilizo esipoliseni. Ukanti nabo babandakanyekayo baza kutshutshiswa enkundleni, ze nangaphakathi kuthatyathwe amanyathelo,” utshilo uLieutenant General Mene.