Abantwana abane abaneminyaka ephakathi kwemithathu nemithandathu babhubhe emva kokuba bevaleleke kwisikhenkcezisi esidala kumntla-mpuma weZambezi kwingingqi yaseNamibia. Aba bantwana bebedlala ngenjikalanga yangoMvulo ngethuba kusenzeka esi sehlo.
Ngokutsho kwamapolisa, abantwana bavaleleke ngaphakathi kwesi sikhenkcezisi sidala esingasetyenziswayo ngempazamo baza bafuthaniseleka. Ababini kwaba bantwana babhubhele ngaphakathi kwisikhenkcezisi, logama abanye ababini babhubhele esibhedlele ngethuba befumana unyango.
UAranges Shoro ongomnye wooyise babantwana uchaze le meko: “Ndithe xa ndingena ndabona aboncedo lokuqala benceda intombi yam nenye intwazana. Baye bababalekisela esibhedlele, ngelixa abanye ababini befakwe kwiimoto zogcino-zidumbu.”
Inkumanda yamapolisa kwingingqi yaseZambezi, uAndreas Shilelo, uthe isikhenkcezisi besinehuka evulwa ngaphandle kuphela, kwaye abantwana bavaleleke ngaphakathi isithuba esingangeyure enesiqingatha phambi kokuba bafuthaniseleke.
Akukacaci ukuba kutheni isikhenkcezisi esingasebenziyo sishiywe ngaphandle kwendlu yenye yeentsapho ezichaphazelekayo. Uphando luyaqhuba ukujonga iimeko eziphathelene nale ntlekele.