Bagoduke bencume olukabhulankethe abalandeli be’Orlando Pirates emva kokuphumelela umdlalo obalulekileyo. IPirates icambalalise Amatsatsantsa ngamagowuli amathathu kwelinye emdlalweni weMTN8 otake iintlantsi e’Orlando Stadium, eSoweto, namhlanje ebusuku. Ukuphumelela kwePirates umdlalo wokuqala kuyinika ithuba lokwenza imbali njengeqela eliphumelele iMTN8 kathathu amatyeli elandelelana. Kanti kwelinye icala, iphelile indlela yeSuperSport United kwiMTN8.
Umdlalo utake iintlantsi kwa kwimizuzu yokuqala. Amatsatsantsa ankqonkqoze kwangoko ezipalini zikaSipho Chaine – kodwa iPirates ikwazile ukuvala amazibuko. Ethubeni, abadlali bePirates batshintshe igiya bayihlasela macala onke iSuperSport. URicardo Goss uzikhuphe zingena phakathi iibhola eziliqela. Phambi kokuphela kwesiqingatha sokuqala, u’Olisa Ndah ufake igowuli elihle emva kokunikelwa ibhola entle nguMonnapuleng Saleng. Amatsatsantsa aye kwisigaba sesibini somdlalo enetyala.
UVincent Pule, obekade edlalela iPirates, ubhakuzelise umnatha kwathi cwaka ebaleni ebeligcwele abalandeli beqela laseSoweto. Emva koko amaqela asukelene. Kuye kwaphela ixesha lomdlalo kungekho qela elikwazileyo ukusebenzisa amathuba emdlalweni. Kwixesha elongezelelweyo, uSaleng uvuyise indimbane yabalandeli bePirates ngegowuli elihle. Khange bayeke ukuzama ukufumana igowuli lokulinganisa abadlali beSuperSport United – kodwa besekunzima ukugqobhoza.
Ifolosi yeBucs, uEvidence Makgopa, ingene yabethelela isikhonkwane sokugqibela kwibhokisi engcwatywe ngayo iSuperSport. UMakgopa udibene nebhola ebisuka kuRicardo Goss wayibeka emnatheni. Akawugqibanga uGavin Hunt umdlalo oye wanikwa ikhadi elibomvu ngenxa yokugibisela amazwi amabi kusompempe. Oku kwenzeke emva kokuba uHunt ecinge ukuba uSaleng ufumene ibhola elalele. Ekugqibeleni, iPirates idlulele phambili emva kokuphumelela umdlalo wokuqala.
Amawele angamagqirhakazi aziwa njengeeNkonjane zooFaku azicelela iivoti