ULebohang Maboe uthi iChiefs iza kuqhuba kakuhle kwiCAF Confederation Cup
ULebohang Maboe ngumdlali weKaizer Chiefs ohlaselayo.
Image: KC Media
Omnye wabadlali abanamava ebholeni ekhatywayo, uLebohang Maboe, uqinisekile ukuba iKaizer Chiefs iza kuqhuba kakuhle kwiCAF Confederation Cup. Ukuthethe oku phambi komdlalo omkhulu ophakathi kweChiefs neZamalek ngomso ngentsimbi yesithathu emalaga ePeter Mokaba Stadium, ePolokwane.
Emva kokudlala kwiCAF Champions League engumdlali weMamelodi Sundowns - uMaboe ngoyena mdlali onamava kakhulu kwiChiefs ngoku. Njengokuba Amakhosi elungiselela ukudibana neZamalek, umdlali onjengoMaboe angaluncedo kakhulu xa edityaniswe nabangaqhelananga nemidlalo enzima.
Kodwa lo nto iza kuxhomekeka kubaqeqeshi abangekamdlalisi kakhulu ukusukela oko efikile ekuqaleni kwesizini eqhubekayo. Ebekhe wonzakala ithuba elide - kodwa uphilile ngoku. Ayimxhalabisanga lo nto kodwa uMaboe ngoba uthi ixesha lakhe liza kufika.
"Ndiqhelile noko ngoku futhi ixesha lam lokudlala liyeza," utshilo ethetha neentatheli eNaturena kule veki. UMaboe ukhululwe yiSundowns ekupheleni kwesizini ka2024/25. "Abadlali abadlalayo eqeleni baqhuba kakuhle. Ndizithembile, ixesha lam lokudlala liza kufika. Okwangoku ndixhasa abanye abadlali," utshilo uMaboe ovumileyo ukuba amava wakhe angayinceda iChiefs emidlalweni yeCAF.
"Amava endinawo aza kuba luncedo eqeleni. Ndiyayazi indlela ekunzima ngayo ukudlalela kude nekhaya. Umdlalo ogqithileyo ubonisile ukuba besiwulawula umdlalo - kodwa asakwazi ukusebenzisa amathuba. Ndiqinisekile siza kukhula kwiCAF Confederation Cup," utshilo uMaboe phambi komdlalo obalulekileyo.
Amakhosi abethwe yiAl Masry ngamagowuli amabini kwelinye emdlalweni obukwiveki ephelileyo. Emva komdlalo wangomso, Amakhosi aza kulungiselela ukudibana neChippa United kwiveki ezayo ngoLwesithathu eGqeberha.