Uyigalele amanzi yabanda eyokuhamba kukaMbokazi umqeqeshi wePirates
UMbekezeli Mbokazi ngumdlali we'Orlando Pirates ekuthiwa usecicini lokuya eMelika.
Image: Itumeleng English/Independent Media
Umqeqeshi we'Orlando Pirates, uAbdeslam Ouaddou, uyigalele amanzi yapho into kaMbekezeli Mbokazi ekuthiwa uza kuhamba kungekudala. Emva komdlalo weBetway Premiership obusekuqaleni kwale veki, uAbdeslam Ouaddou uthe uyiva ngabantu into ethethekayo ngomdlali wakhe.
Ukuthethe oku encumile emva kokuba iPirates ibhuqe iChippa United ngamagowuli amabini eqandeni emdlalweni otake iintlantsi eSoweto. Abadlali abaweze iPirates ebufuthanyiselwe nguEvidence Makgopa naye uOswin Appollis.
Kwimpelaveki edlulileyo, kuye kwavakala iindaba ezithi uMbokazi uza kuthengwa liqela laseMelika ekuthiwa yiChicago Fire elidlala kwiMajor League Soccer.
Ukungadlali kwakhe uMbokazi emdlalweni odlulileyo kuqinise amarhe athi iPirates iza kufumana imali eqikelelwa kwizigidi ezingaphezulu kwamashumi amahlanu eerandi (R51-million).
Kuthiwa uBasia Michaels, ongumphathi womdlali, ebeseMelika kwiveki ephelileyo. "Andinalo ulwazi ngezo ndaba. Kum, uMbokazi usengumdlali wam," utshilo umqeqeshi ethetha ngoMbokazi ekutiwa uza kuhamba emva kweAFCON.