UTemba Bavuma uncome ezinye iinkokeli emva kwembali eyenziwe nguMzantsi Afrika

UKpateni weProteas, uTemba Bavuma, uvakalise uvuyo watsho encoma indima eyenziwa ngoogxa bakhe emva kokuzuza impumelelo kule veki. Oku ukuthethe emva kokuba uMzantsi Afrika ubethe AmaNdiya emidlalweni yosuku olunye emibini.

UMzantsi Afrika ukwenze oku emva kwamashumi amabini anesihlanu eminyaka, kweli ityeli ukhokelwa nguTemba Bavuma. Oku kwenzeke kanye emva kokuba uBavuma ebekhe akabikho iqela lesizwe leqakamba lidlala neZimbabwe nePakisatan ngenxa yokonzakala okukhe kwamphatha kakubi kutshanje.

Amakhwenkwe oMzantsi Afrika aphumelele ngemitsi engamakhulu amane anesibhozo (408). Kumangelo okuqala, i-India iqhokre yenza imitsi engamakhulu amabini ananye (201). Walandela uMzantsi Afrika ngomwasalala wemitsi engamakhulu amane anamashumi asibhozo anethoba (489).

Kumangeno wesibini, amaNdiya angene afumana imitsi elikhulu elinamashumi amane (140) - kanti wona uMzantsi Afrika wenze amakhulu amabini anamashumi amathandathu (260) kuwe oothinti abahlanu kuphela kusuku lesibini.

UBavuma uthe uziva ezinzile esikhundleni sakhe ngoba ungqongwe ngabadlali abanamava abaquka uAiden Markram, uKeshav Maharaji noKagiso Rabada noxa engakhange adlale ngenxa yokonzakala.

"Le yindlela yokuphuthuma umdlalo wam ngoba ndiqinisekile ngoku ngento endizama ukuyenza njengomntu noKapteni weqela lesizwe. Sineenkokeli eqeleni lethu lesizwe futhi kukho ukuvana ngendlela esisebenza ngayo. Ndiyakwazi ukuthetha noogxa bam xa kukho into endiyicingayo," utshilo uBavuma.

Emva komdlalo uBavuma uvumile ukuba ebengaqinisekanga ngokubetha i-India. "Endleleni eza apha, khange ndicinge ukuba singayibetha emidlalweni emibini i-India. Yinto enkulu le yenziwe ngabadlali abakweli qela. Senze imbali eza kuhlala ikhunjulwa.

"Sonwabile eqeleni - kodwa siza kuhlala phantsi sihlalutye okwenzekileyo sijonge nendlela esingaqinisa ngayo umsebenzi wethu ukuya phambili," utshilo uBavuma.