AmaZulu angcwabe iChippa United emdlalweni weBetway Premiership
AmaZulu azibethele iChippa United phambi kwabalandeli bayo emdlalweni weBetway Premiership obubanjelwe eBuffalo City Stadium, eMonti.
Image: Pedro Mapelo/I'solezwe lesiXhosa
Abuyela ekhaya AmaZulu encumile emva kokuba engcwabe iChippa United phambi kwabalandeli bayo. Oku kulandela ukubetha kwawo iChippa United ngamagowuli amathathu eqandeni emdlalweni weBetway Premiership obubanjelwe eBuffalo City Stadium namhlanje ebusuku.
Amanqaku apheleleyo athathe AmaZulu awanyusela kwindawo yesihlanu. Emva kweshumi elinanye lemidlalo, AmaZulu aqokelele ishumi elinesibhozo lamanqaku. Yona iChippa isaduda ndawonye emseleni ukusukela oko kuqale isizini.
Kuyiwe kwixesha lokuphumla AmaZulu ehamba phambili ngegowuli elinye eqandeni. Akukho qela ebelizimisele ukuhlasela ngamandla ngoba omabini ebelumkele ukulahlekelwa kwangoko emdlalweni. iqhothozile iChippa United kwicala lokudala amathuba kwade kwavela ipenela emzuzwini wesibhozo.
Ngelishwa layo, uGoodman Mosele akakwazanga ukufumana igowuli ngoba uDarren Johnson uyibambe yahlala esifubeni sakhe. Amanye amathuba ayikwazanga ukuwasebenzisa iChippa United ngoba AmaZulu ebethe qwa.
Njengokuba umdlalo ubudikidiki ixesha elide, izinto ziye zajika xa uHendrick Ekstein efaka emnathembi ibhola entle esemhlabeni kanozinti. Yeyona bhola ekhathaze uStanley Nwabali obeganyile phantse sonke isiqingatha sokuqala.
Ingene iphantsi koxinizelelo kwisiqingatha sesibini iChippa United ngoba ibiyiyo ehamba emva phambi kwenani elihle ebelibukele ibhola eBuffalo City. uAthini Maqokolo ubhakuzelise umnatha emva kwemizuzu engaphantsi kweshumi kwisigaba sesibini.
UPule Ekstein ufake elisithathu ngepenela. Umdlalo uphelile iChippa United ingakwazanga ukuphendula. Ngoku iChippa iza kuzama ukubuyisa isidima sayo xa idibana neMagesi FC kkwiveki ezayo ngoLwesibini